Ku munsi wa Kane wa Shampiyona Nyafurika y’Amagare, Abanyarwandakazi Mwamikazi Jazilla yegukanye umudali wa Feza mu batarengeje imyaka 23 naho Ingabire Diane yegukana uw’Umuringa mu Bagore.
Kuri uyu wa Gatandatu, tariki ya 12 Ukwakira 2024 hakinwe isiganwa ribanziriza umunsi wa nyuma wa Shampiyona Nyafurika y’Amagare aho hasiganwe mu muhanda abagore n’abatarengeje imyaka 23 bazenguruka intera y’ibilometero 104,4 muri Iten.
Ingabire Diane ni we Munyarwandakazi wasoreje hafi, yegukana umudali w’Umuringa nyuma yo kuba uwa gatatu asizwe iminota irindwi n’amasegonda 21 n’Umunya-Afurika y’Epfo Moolman Ashleigh wakoresheje amasaha atatu, iminota irindwi n’amasegonda 50, akurikira Dawit Adiam wo muri Eritrea.
Dawit Adiam w’imyaka 21, ni we kandi wahise utsindira umudali wa Zahabu mu cyiciro cy’Abatarengeje imyaka 23, akurikirwa n’Umunyarwandakazi Mwamikazi Jazilla wabaye uwa kane ku rutonde rusange akoresheje ibihe bimwe na babiri bamuri imbere barimo Ingabire.
Imidali ibiri Abanyarwandakazi begukanye kuri uyu wa Gatandatu, yiyongereye ku wa Zahabu wegukanwe na Team Rwanda ku wa Kane mu gusiganwa n’igihe nk’ikipe, abagabo bavanze n’abagore.
Shampiyona Nyafurika y’Amagare ya 2024 izasozwa ku Cyumweru aho hazakinwa isiganwa ryo mu muhanda ku bagabo n’abatarengeje imyaka 23, bose bazakora intera y’ibilometero 154,4.
