Ikipe y’Igihugu y’Amavubi yashyize hanze urutonde rw’abakinnyi 26 bazifashishwa mu mikino yo gushaka itike y’igikombe cya Afurika cy’abakina imbere mu bihugu byabo (CHAN2024).
U Rwanda rwatomboye kuzakina na ya Djibouti, aya makipe azakina imikino ibiri yose izabera i Kigali, kuri Stade Amahoro, tariki ya 27 na 31 Ukwakira 2024.
Kuri uyu wa 20 Ukwakira, Amavubi yashyize hanze urutonde rw’abakinnyi azifashisha muri iyi mikino barimo banyezamu bane aribo Hakizimana Adolphe (AS Kigali), Muhawenimana Gad (Gorilla FC), Niyongira Patience (Police FC) na Habineza Fils (Etoile de L’Est).
Ba myugariro ni Fitina Omborenga (Rayon Sports), Byiringiro Gilbert (APR FC), Ishimwe Christian (Police FC), Niyomugabo Claude (APR FC), Niyigena Clement (APR FC), Nshimiyimana Yunusu (APR FC), Hirwa Jean (Bugesera FC) na Ndayishimiye Thierry (AS Kigali).
Abakina hagati barimo Muhire Kevin (Rayon Sports), Ndayishimiye Didier (AS Kigali), Ruboneka Bosco (APR FC), Iradukunda Simeon (Police FC), Ngabonziza Pacifique (Police FC) na Ndikumana Fabio (Marine FC).
Abataha izamu ni Niyibizi Ramadhan (APR FC), Tuyisenge Arsène (APR FC), Dushimimana Olivier (APR FC), Mugisha Gilbert (APR FC), Iraguha Hadji (Rayon Sports), Kabanda Serge (Gasogi United), Mbonyumwami Taiba (Marine FC) na Iyabivuze Osée.
Kuri uru rutonde hari abakinnyi batagaragayemo byari byitezwe ko bahamagarwa aribo Niyonzima Olivier Seif wa Rayon Sports, Hakizimana Muhadjiri ndetse na Mugisha Didier ba Police FC.
Biteganyijwe ko ku wa mbere, tariki ya 21 Ukwakira, aribwo abakinnyi bahamagawe bazatangira umwiherero bitegura imikino izahuza U Rwanda na Djibouti.
Ikipe izatsinda hagati y’u Rwanda na Djibouti izahura n’indi kipe izatsinda hagati ya Afurika y’Epfo na Kenya, imikino izazihuza izaba mu Kuboza.
