Ambasaderi w’u Rwanda muri Singapore, Innocent Muhizi, yashyikirije Sultan wa Brunei Darussalam, Haji Hassanal Bolkiah Mu’izzaddin Waddaulah, impapuro zimwemerera guhagararira u Rwanda muri icyo gihugu cyo muri Aziya.
Uyu muhango wabaye ku wa 19 Ukwakira 2026, mu Ngoro y’Umwami ya Istana Nurul Iman muri Brunei Darussalam.
Ambasaderi Muhizi azakomeza gukorera muri Singapore, ari na ho afite icyicaro, ariko ahagararire n’inyungu z’u Rwanda muri Brunei.
Ambasade y’u Rwanda muri Singapore yatangaje ko iyi ntambwe izafasha ibihugu byombi kwagura ubufatanye, by’umwihariko mu bucuruzi, ishoramari no guteza imbere imikoranire hagati y’abaturage.
Brunei Darussalam iherereye mu Majyepfo y’Uburasirazuba bwa Aziya, ku kirwa cya Borneo, ndetse ubukungu bwayo bushingiye ahanini kuri peteroli na gaz.
U Rwanda rukomeje kwagura umubano w’ubufatanye n’ibihugu bya Aziya, hagamijwe kongera amahirwe y’ishoramari, ubucuruzi n’iterambere ry’ubukungu.
