Kuri uyu wa kabiri tariki 18 Kanama 2026 saa mbiri n’igice z’ijoro (20:30) muri BK Arena harabera umukino wa mbere (Game 1) w’imikino ya nyuma ya kamarampaka muri basketball mu bagabo, Cheetah Energy RBL Playoffs, aho APR BBC ihura na Patriots BBC.
Umukino wo kuri uyu munsi uraza kuba ari uwa mbere mu mikino 7 iteganyijwe, amakipe yombi akaba agomba gutanguranwa gutsinda imikino 4.
APR BBC y’umutoza James Maye Jr yageze ku mukino wa nyuma isezereye RSSB Tigers BBC naho Patriots BBC y’umutoza Niyomugabo Munyandamutsa Sunny yageze ku mukino wa nyuma isezereye REG BBC.
Aya makipe ni ubwa kabiri agiye guhurira ku mukino wa nyuma wa kamarampaka kuko yaherukaga kuhahurira muri 2024 ubwo APR yatwaraga igikombe itsinze Patriots imikino 4-2, bivuze ko iki gishobora kuba igihe cya Patriots cyo kwihorera ku ikipe y’Ingabo z’Igihugu.
Ni ubwa mbere umutoza Niyomugabo Munyandamutsa Sunny agiye gutoza umukino wa nyuma kuva yaba umutoza mukuru wa Patriots BBC muri Mutarama 2025 asimbuye Henry Mwinuka, byamugize umutoza wa kabiri w’umunyarwanda watoje iyi kipe nyuma ya Karima Cyrille wayitoje muri 2014.
Umutoza James Maye Jr we si ubwa mbere agiye gutoza imikino ya nyuma ya kamarampaka kuko ari nawe watwaye igikombe cya Shampiyona giheruka cya 2025 n’icya 2024.
James Maye Jr yageze muri APR BBC mu mpeshyi ya 2024 ubwo yari umutoza wungirije wa Mazen Trakh mbere yo kugirwa umutoza mukuru ndetse yari mu batoza bafashije RSSB Tigers gutwara BAL y’uyu mwaka aho yari yungirije Henry Mwinuka.
Icyo amateka avuga
APR BBC niyo kipe nkuru mu myaka no mu bikombe ugereranyije na Patriots, APR kuva yatangira gukina Shampiyona y’u Rwanda mu 1995 imaze gutwara ibikombe 16 harimo n’ibikombe bitatu (3) biheruka, itsindirwa ku mukino wa nyuma inshuro 2 muri 2013 na 2014 zombi yatsinzwemo na Espoir BBC kuri ubu iri mu cyiciro cya kabiri.
APR BBC imaze gukina BAL inshuro 2 aho ku nshuro ya mbere yananiwe kurenga amatsinda (Conference) naho ku nshuro ya kabiri ibasha kweguakana umwanya wa 3.
Ku ruhande rwa Patriots BBC yatangiye gukina Shampiyona mu 2014, kuva icyo gihe yatwaye ibikombe 4 biyigira ikipe ya 3 imaze gutwara ibikombe byinshi bya Shampiyona inyuma ya APR ifite 16 na Espoir BBC ifite 5, harimo n’ibikombe 3 yatwaye bikurikirana muri 2018, 2019 na 2020 ari nacyo gikombe iheruka.
Patriots BB niyo kipe ya mbere yo mu Rwanda yakinnye BAL muri 2021 ubwo iri rushanwa Nyafurika ryakinwaga bwa mbere, icyo gihe yasoreje ku mwanya wa 4 nyuma yo gutsindwa na Petro de Luanda ku mukino wo guhatanira umwanya wa 3.
Aya makipe yombi ahuriye ku gahigo ko kuba ariyo yabashije gutwara ibikombe bya Shampiyona inshuro 3 zikurikiranya, indi kipe ifite aka gahigo ni Espoir BBC.
Imibare yo muri Shampiyona y’uyu mwaka
Mu mikino isanzwe ya Shampiyona, APR BBC yarangije ku rutonde rwa Shampiyona rw’amakipe 9 n’amanota 30 mu mikino 16, yatsinze imikino 14, itsinwa imikino 2, yatsinze amanota 1515, itsindwa amanota 1115 bivuze ko yari yizigamye amanota 400.
Patriots BBC yo yarangije ku rutonde rwa Shampiyona ari iya kabiri inyuma ya APR BBC n’amanota 29, yatsinze amanota 1388, itsindwa amanota 1155 bivuze ko yari yizigamye amanota 233 y’ikinyuranyo, mu mikino 16 yatsinzemo imikino 13, itsindwa imikino 3.
Mu mikino 2 ya Shampiyona izi kipe zahuyemo zombi zaratsindanwe aho umukino ubanza warangiye APR itsinze amanota 78-75, naho mu mukino wo kwishyura Patriots BBC itsinda APR BBC amanota 69-67.
Imibare yo mu mikino ya kamarampaka
Muri 1/2 APR BBC yahuye na RSSB Tigers birangira iyisezereye nyuma yo kuyitsinda imikino 3-2, APR yatsinze amanota 459, itsindwa amanota 435 bivuze ko yari yizigamye amanota 24.
Ushyize ku mpuzandengo, APR itsinda amanota 91.8 kuri buri mukino, igatsindwa amanota 87.
Ku ruhande rwa Patriots BB yahuye na REG BBC muri 1/2 birangira nayo iyisezereye iyitsinze imikino 3-2, Patriots BBC yatsinze amanota 375, itsindwa amanota 356 bivuze ko yari yizigamye amanota 19.
Ushyize ku mpuzandengo, Patriots BBC itsinda amanota 75 kuri buri mukino, igatsindwa amanota 71.
Iyi mibare igaragaza ko APR BBC ari nziza mu busatirizi kurusha mu bwugarizi, naho Patriots BBC ikaba nziza mu bwugarizi kurusha mu busatirizi, ibi bituma uyu mukino utera amatsiko uko uzarangira.
Abakinnyi bo kwitega ku mukino wa nyuma
Ku ruhande rwa APR BBC abakinnyi bo kwitega barimo Leonard Craig Randall II umaze gutsindira iyi kipe amanota menshi kurusha abandi, yayitsindiye amanota 218, abandi bakinnyi bo kwitega barimo Marquise Teafale Lenard Jr, Filer Jovon Adonis na Ntore Habimana bameze neza muri iyi mikino ya kamarampaka.
Umukinnyi wo kwitega muri Patriots BBC ni Damaria Franklin umaze gutsindira iyi kipe amanota 455, Stubbs Jeffery Tyrone, Garba Chingka Kennedy na Kwizera Hubert Sage uri mu bakinnyi bari kwigaragaza cyane mu mikino ya kamarampaka.
