Ikipe y’Igihugu y’u Rwanda y’abatarengeje imyaka 18 mu ngimbi yakinnye umukino wa gicuti n’ikipe ya Basketball Vereniging Groningen (BVG) y’abatarengeje imyaka 18 mu rwego rwo kwitegura imikino yo gushaka itike y’igikombe cya Afurika, FIBA U18 AfroBasket Qualifiers.
Uyu mukino wa gicuti wakinwe ku mugoroba wo kuri uyu wa mbere tariki 13 Nyakanga 2026 muri Petit Stade i Remera warangiye ikipe y’u Rwanda itsinze BVG yo mu Buholandi amanota 74-38.
Amakipe y’Igihugu y’u Rwanda y’abatarengeje imyaka 18 mu bangavu n’ingimbi akomeje imyitozo yitegura imikino y’akarere ka 5 mu gushaka itike y’Igikombe cya Afurika kizabera i Abidjan muri Côte d’Ivoire muri uyu mwaka.
Iyi mikino yo gushaka itike y’igikombe cya Afurika izabera i Cairo mu Misiri kuva tariki 23 Nyakanga kugeza tariki 29 Nyakanga 2026.
Amakipe azitabira iyi mikino mu cyiciro cy’abangavu ni u Rwanda, Misiri na Tanzania.
Amakipe y’ibihugu azitabira mu cyiciro cy’ingimbi ni u Rwanda, Sudani y’Epfo, Misiri, Tanzania, Kenya, Uganda na Somalia.
Ikipe y’igihugu y’u Burundi nayo yagombaga kwitabira iyi mikino ariko Ishyirahamwe ry’Umukino wa Basketball muri iki gihugu, FEBABU, ryatangaje ko ikipe yabo y’igihugu itazitabira iyi mikino kubera ikibazo cy’amikoro.
