Abaturage batanu bahitanwe n’ibisasu Ingabo za Repubulika Iharanira Demokarasi ya Congo, FARDC zifatanyije n’abarwanyi b’Umutwe w’Iterabwoba wa FDLR, zagabye mu Karere ka Rubavu kuri uyu wa Mbere, tariki ya 27 Mutarama 2025.
Abasirikare ba FARDC n’abarwanyi ba FDLR batangiye kurasa mu Rwanda nyuma y’uko Umutwe wa M23 utangaje ko wafashe Umujyi wa Goma.
Umuvugizi w’Ingabo z’u Rwanda, Brig Gen Ronald Rwivanga, yabwiye RBA ko Ingabo za FARDC na FDLR zarashe ku butaka bw’u Rwanda, abaturage batanu bahasiga ubuzima n’abandi 35 barakomereka.
Ati “Abakomeretse bari kwitabwaho mu bigo nderabuzima bitandukanye.’’
Yahumurije Abanyarwanda, abizeza ko umutekano ari wose n’ubusugire bw’Igihugu burinzwe neza.
Yagize ati “RDF irakomeza gufata ingamba zose zishoboka kandi zikenewe kugira ngo hirindwe ibitero byose byambukiranya imipaka byagabwa ku butaka bw’u Rwanda. Ingabo z’u Rwanda zirahumuriza Abanyarwanda ko umutekano ari wose n’ubusugire bw’Igihugu bukomeje kurindwa neza.’’
Ingabo z’u Rwanda zijeje ko zafashe ingamba zose kandi zikenewe mu kwirinda ibitero byambukiranya imipaka bishobora kugabwa ku butaka bw’u Rwanda.
Brig Gen Ronald Rwivanga yavuze ko RDF yafatiye mu kirere ibisasu byaterwaga ku butaka bw’u Rwanda, ikabishwanyaguza
Ati “Ni ko bimeze, hari ibyo twagiye turasa, ibisasu byabo ariko nk’uko mubizi ntitwashoboye kubirasa byose. Turimo kugerageza ibishoboka byose kugira ngo tuburizemo ibyo bisasu.’’
Ingabo zu Rwanda zashimangiye ko nta mpungenge ko intambara ikomeje gukaza umurenge mu Mujyi wa Goma ishobora kwambuka ikagera mu Rwanda.
Umuvugizi w’Ingabo z’u Rwanda, Brig Gen Ronald Rwivanga, yavuze ko RDF imaze iminsi yiteguye mu buryo bwose bushoboka.
Yagize ati “RDF yafashe ingamba zose zishoboka kandi zikenewe kugira ngo twirinde ibitero byose byakwambukiranya imipaka kandi byagabwa ku butaka bw’u Rwanda. Ingabo zacu ziri tayari.’’
Mu gitondo cyo kuri uyu wa Mbere, abakozi ba Loni bakomeje guhungira mu Rwanda aho bavanwe mu Karere ka Rubavu, bajyanwa mu Mujyi wa Kigali aho bazahagurukira berekeza mu Mujyi wa Kinshasa muri RDC.
Kuri uyu munsi kandi Ingabo za FARDC n’abandi barwanyi barimo aba Wazalendo barenga 120 bishyikirije Ingabo z’u Rwanda, bafite imbunda, amasasu n’ibindi bikoresho bya gisirikare.
Impunzi z’Abanye-Congo na zo zahungiye mu Rwanda zakiriwe mu Kigo cy’Urubyiruko cya Vision Jeunesse Nouvelle, giherereye mu Murenge wa Gisenyi.
