Abaririmbyi b’indirimbo zo kuramya no guhimbaza Imana bagize itsinda rya Ben na Chance, bararikiye abakunzi babo kuzitabira ku bwinshi igitaramo cya Pasika bazakorera mu nyubako y’imyidagaduro ya BK Arena.
Babinyujije ku rukuta rwa Instagram, kuri uyu wa Mbere, tariki ya 02 Werurwe 2026, basangije ababakurikira amashusho yabo bari muri BK Arena, bemeza bidasubirwaho ko bazahataramira mu gitaramo bise ‘Easter Jubilee Music Gathering’.
Ben na Chance basanzwe barashakanye, batangaje ko iki gitaramo cy’amateka ari ikizafasha abantu kwizihiza neza umunsi Mukuru wa Pasika.
Bagize bati “Kigali mwitegure! Igitaramo cya Pasika ndetse no kuryoherwa n’umuziki wa Ben na Chance biraje mu nyubako nziza twita mu rugo , BK Arena.”
Tariki ya 16 Gashyantare 2026, nibwo ku nshuro ya mbere aba baramyi bashyize hanze integuza y’igitaramo cya Pasika bateganya gukora muri BK Arena, icyo gihe bararitse abakunzi b’indirimbo zo kuramya no guhimbaza Imana kuzitabira iki gitaramo kuko kizaba ari igitaramo gihembura imitima.
Iki gitaramo giteganyijwe kuba ku Cyumweru, tariki ya 5 Mata 2026. Andi makuru arambuye arebana n’amatike ndetse n’abandi bahanzi bazafatanya n’aba baramyi bizashyirwa hanze mu minsi iri imbere.
Nyuma yo gukorera igitaramo muri BK Arena, biteganyijwe ko aba baramyi bazahita berekeza mu ruhererekane rw’ibitaramo bazakorera ku Mugabane w’i Burayi mu bihugu birimo; Ubudage, Norvege, Ububiligi ndetse n’u Buholandi, bizaba muri Mata na Gicurasi 2026.
Ben na Chance ni abaramyi bakunzwe muri iyi njyana izwi nka ‘gospel’ mu Karere ka Afurika y’i Burasirazuba, aho bamenyekanye cyane mu zirimo Zaburi yanjye, Yesu arakora, Itegure urahetse, Abagenzi, n’izindi nyinshi.
