Iyo bigeze ku wa Gatanu, umubiri urabimenya, maze ugatangira kumva ibinezaneza muri wowe kuko uba ugiye kwinjira mu minsi ya wikendi ahanini usanga itarimo ya mihangayiko na shuguri uhoramo mu minsi isanzwe y’icyumweru.
Mu gihe twinjira muri wikendi ushobora kwibaza ngo ese nihe? Ni ryari? hamfasha gushira irungu muri iyi wikendi.
- Bruce Melodie na Bwiza i Burayi
Ku wa Gatandatu, tariki ya 07 Werurwe 2026, Bruce Melodie azataramira i Brussels mu Bubiligi, mu gitaramo cyiswe “Afro Legacy Eve of Women’s Day” azahuriramo na Sheebah Karungi.
Aba bahanzi bombi kuri ubu bamaze kugera mu Bubiligi, bazasusurutsa abazitabira iki gitaramo kizaba mu rwego rwo kuzirikana uruhare rw’umugore mu iterambere ndetse no kwizihiza umunsi mpuzamahanga w’umugore, wizihizwa tariki ya 8 Werurwe buri mwaka.
Iki gitaramo kizayoborwa na Muyango Claudine na we wamaze kugera i Brussels
2.Bwiza i Stockholm muri Suède
Umuhanzikazi Bwiza ukubutse mu bitaramo bya Tour du Rwanda Festival kuri ubu yamaze kugera mu mujyi wa Stockholm muri Suède aho azataramira mu gitaramo kibimburira uruhererekane rw’ibitaramo ateganya gukorera hiryo no hino ku Isi, amenyekanisha Album ye ya kabiri aheruka gushyira hanze yise “ Home”
Igitaramo cya Bwiza i Stockholm kizaba ku wa Gatandatu, tariki ya 07 Werurwe 2026, iki gitaramo cyikaba gifite insanganyamatsiko yo kwizihiza umunsi mpuzamahanga wahariwe umugore ,wizihizwa tariki ya 08 Werurwe buri mwaka.
Uretse kuzirikana ndetse no kwishimira uruhare rw’abagore mu iterambere ry’Isi muri rusange, iki gitaramo kizatangirwamo ubukangurambaga ku kwirinda ndetse no kurwanya kanseri y’inkondo y’umura izwi nka “ Cervical Cancer” ihitana abagore 1000 ku munsi ku Isi nkuko imibare ya OMS ibigaragaza.
3.Patrick Salvado na Teacher Mpamire i Kigali
Abanyarwenya bakomeye ku rwego mpuzamahanga bo muri Uganda, Teacher Mpamire ndetse na Patrick Salvado , kuri uyu wa Gatanu tariki ya 06 Werurwe 2026, baraza gutaramira i Kigali mu nyubako y’imikino n’imyidagaduro ya Kigali Universe mu gitaramo cy’urwenya cyiswe “Thank God it’s Funny”
Mbere y’uko basusurutsa abitabira iki gitaramo, ku wa Kane tariki ya 05 Werurwe 2026 aba banyarwenya basuye Ambasade ya Uganda mu Rwanda baboneraho gutumira ubuyobozi bwa Ambasade mu gitaramo bakorera i Kigali.
Iki gitaramo kiraza gususurutswa n’abandi banyarwenya barimo : Muhinde, Babou, Rusine, n’abandi benshi.
4. APR FC VS Marines FC
Abakunda ruhago muri iyi wikendi nta rungu.Shampiyona y’icyiciro cya mbere mu Rwanda irakomeza ku munsi wa 23 wayo aho mu karere ka Rubavu ari ibirori ndetse n’ubushyuhe buturutse ku kuba amakipe abiri ya mbere akomeye mu Rwanda aza kuba ari i Rubavu mu mpera z’icyumweru.
Ikipe ya APR FC irakora urugendo yerekeza mu karere ka Rubavu aho izakirwa na Marine FC mu mukino w’umunsi wa 23 wa Rwanda Premier League, uzaba ku wa Gatandatu tariki ya 07 Werurwe 2026 kuri sitade Umuganda, Saa 15h00.
APR FC kuri ubu iri ku mwanya wa kabiri aho ifite amanota 42 irasabwa gukomerezaho ntigire ikosa ikora kuko kuri ubu irusha inota rimwe Al Merrikh SC iyikurikiye.
Marine FC izakira APR FC yo iri ku mwanya wa 9 aho ifite amanota 28, iyi kipe nubwo itajya yoroherwa na APR FC, kuri iyi nshuro yarahiriye kuyitesha amanota.
4. Rayon Sports VS Etincelles FC
I Rubavu ibirori bya ruhago bizakomeza ku cyumweru tariki ya 08 Werurwe 2026, aho ikipe ya Etincelles FC iri mu zifite abakunzi benshi i Rubavu izakira Rayon Sports mu mukino w’umunsi wa 23 wa Rwanda Premier League uzabera kuri sitade Umuganda.
Rayon Sports ijyanye i Rubavu impamba ishyitse nyuma yo kunyagira yihanukiriye ikipe ya City Boys mu gikombe cy’amahoro aho yayitsinze ibitego 11-0 mu mikino yombi.
Ku rundi ruhande Etincelles FC iheruka i Kigali ubwo yagwaga miswi na As Kigali mu mukino w’umunsi wa 22 wa Rwanda Premier League, irakubita agatoki ku kandi aho yarahiriye gukura amanota n’amafaranga kuri Rayon Sport ijyanye abafana benshi i Rubavu.
Rayon Sports irasabwa gutsinda uyu mukino kugirango ibashe kwegera amakipe ari imbere arimo Al Merrikh SC iyirusha amanota 4, APR FC iyirusha amanota 5 ndetse na Al Hilal SC iyirusha amanota 8.
Ku rundi ruhande Etincelles FC irasabwa gutsinda uyu mukino kuko kuri ubu irusha amanota abiri yonyine Muhanga FC iri ku mwanya wa nyuma, ikarusha inota rimwe Amagaju FC ari ku mwanya wa 17 ku rutonde rwa Shampiyona.
5. Siporo Rusange i Kigali
Mu rwego rwo kuzirikana uruhare rw’umugore mu iterambere ry’umuryango ndetse no kwizihiza umunsi mpuzamahanga w’umugore, wizihizwa tariki ya 8 Werurwe buri mwaka.
Hateguwe igikorwa cya siporo rusange izabera hirya no hino mu gihugu, ikazaba ku Cyumweru tariki ya 08 Werurwe 2026, kuva Saa 7h00-10h00, abatuye i Kigali bakazahurira kuri Kigali Convention Center.
Bamwe mu bagore bafite amazina azwi mu Rwanda barimo ministiri wa siporo Nelly Mukazayire, umunyamakurukazi Anita Pendo, umukinnyi wa Filime Rosine Bazongere ndetse n’abandi bemeje ko bazitabira iyi siporo rusange idasanzwe.
6. Tennis i Kigali
Ku nshuro ya gatatu yikurikiranya mu myaka itatu irushanwa rya Rwanda Challenger ryagarutse.
Iri rushanwa ririmo kubera muri IPRC Kigali rigeze aharyoshye aho kuri uyu wa Gatanu, tariki ya 06 Werurwe 2026, ari imikino ya ½ aho umukino utegerejwe n’abantu benshi ari uhuza umutaliyani Marco Cecchinato ndetse n’umusuwisi Joel Schwaelzrer bacakiranana Saa 12h30, ni mugihe undi mukino wa ½ uhuza Umufaransa Arhur Gea n’Umutaliyani Stefano Napolitano uba Saa 10h30.
Umukino wa nyuma w’irushanwa rya Rwanda Challenger 2026 ukaba uteganyijwe ku munsi w’ejo, tariki ya 07 Werurwe 2026.
Kubifuza kureba iyi mikino kwinjira bikaba ari ubuntu
7. APR BBC VS Patriots BBC
Ku Cyumweru tariki ya 08 Werurwe 2026, muri Petit Stade ni ho wasoreza wikendi yawe maze ugatangirana icyumweru akanyamuneza n’imbaduko idasanzwe.
Muri Petit Stade, Saa 20h00 z’umugoroba ikipe ya APR BBC izakira Patriots BBC mu mukino w’umunsi wa 12 wa Rwanda Basketball League.
Kwinjira ni amafaranga ibihumbi bitatu mu myanya isanzwe (Regular), ibihumbi 10 hafi y’ikibuga (Courtside) ndetse n’ibihumbi 15 imbere aho uba ureba neza abakinnyi (Front row)
Wikendi y’ibirori n’imikino
