Ikipe ya Kiyovu Sports yegukanye igikombe kiruta ibindi mu Rwanda, FERWAFA Turbo King Super Cup 2026, nyuma yo gutsinda Police FC igitego 1-0 ku mukino wa nyuma.
Igitego cyatandukanyije impande zombi muri uyu mukino wa nyuma wabereye muri Kigali Pele Stadium kuva saa 15:00, cyatsinzwe na Hakim Hamis ku munota wa 83.
Hakim Hamis ni igitego cya mbere yari atsinze muri Kiyovu Sports ndetse ni nawo mukino wa mbere yarakiniye iyi kipe izwi nk’Urucaca nyuma yo kuva muri Gasogi United.
Kiyovu Sports nk’ikipe yegukanye igikombe kiruta ibindi yahawe imidari ya zahabu, igikombe ndetse na sheke ya miliyoni 40 Frw naho Police FC ya kabiri yahawe imidari ya feza na sheke ya miliyoni 20 Frw.
Kiyovu Sports yari yageze ku mukino wa nyuma isezereye Mukura VS&L naho Police FC yari yageze ku mukino wa nyuma isezereye Rayon Sports.
Ni ubwa mbere Kiyovu Sports itwaye iki gikombe, ni ubwa mbere yarigikinnye ndetse ibaye ikipe ya mbere itwaye iki gikombe cyakinwe n’amakipe 4 aho kuba abiri nk’uko byari bisanzwe.
Izi ni intangiriro nziza z’umwaka kuri Kiyovu Sports y’umutoza Harrison Mark Simon ndetse biratanga icyizere ko yazitwara neza.
