Inteko Rusange ya Sena yemeje Dr Kadozi Edward ku mwanya w’Umuyobozi Mukuru w’Inama Nkuru y’Amashuri Makuru na za Kaminuza, HEC.
Kuri uyu wa Mbere, tariki ya 20 Mutarama 2025, ni bwo Inteko Rusange ya Sena yemeje ko isuzuma ryakozwe na za komisiyo kuri dosiye ze zagaragaje ko afite ubumenyi n’ubushobozi bizamufasha kuzuza neza inshingano yahawe.
Iyi Nteko Rusange ya Sena kandi yemeje Muhongerwa Agnes nk’Umugenzuzi Mukuru Wungirije w’Urwego rushinzwe kugenzura iyubahirizwa ry’Uburinganire n’Ubwuzuzanye mu Rwanda (Gender Monitoring Office-GMO).
Dr Kadozi Edward yagizwe Umuyobozi Mukuru wa HEC, asimbuye Dr Rose Mukankomeje wari kuri uwo mwanya kuva mu 2019.
Izi mpinduka zanyujijwe mu itangazo ry’Ibiro bya Minisitiri w’Intebe ryo ku wa 17 Mutarama 2025.
Dr Kadozi afite ubunararibonye bw’igihe kirekire aho amaze imyaka 14 mu bijyanye no kubakira abantu ubushobozi mu by’ubucuruzi, ubukungu, ikoreshwa ry’ingufu no kubungabunga ibidukikije.
Yabaye Umwarimu muri Kaminuza y’u Rwanda no muri Kaminuza Yigenga ya Kigali (ULK), aho yigishaga Ubukungu n’Iterambere ku biga mu Cyiciro cya Gatatu cya Kaminuza.
Dr Kadozi afite Impamyabumenyi y’Ikirenga mu bijyanye n’Ubukungu, yakuye muri Kaminuza ya Amsterdam mu Buholandi mu 2019. Afite n’Impamyabumenyi y’Icyiciro cya Gatatu cya Kaminuza yakuye muri Kaminuza ya Tsinghua yo mu Bushinwa ndetse n’indi Mpamyabumenyi y’Icyiciro cya Kabiri yavanye muri Kaminuza y’u Rwanda.
