Dr Murigande Charles ni umugabo ufite ibigwi bikomeye muri politiki y’u Rwanda, aho yakoze mu nzego zirimo uburezi kuko yayoboye iyari Kaminuza Nkuru y’u Rwanda, aba Minisitiri w’Uburezi; inshingano ze azisoreza muri Kaminuza y’u Rwanda nk’Umuyobozi Mukuru Wungirije Ushinzwe Iterambere.
Dr Murigande uri mu kiruhuko cy’izabukuru, ariko ugifite aho ahuriye n’uburezi kuko ubu ari Umuyobozi w’Inama y’Ubutegetsi ya Kepler College, yagaragaje impamvu Minisiteri y’Uburezi iri muzikunze guhindurirwa abayobozi cyane, barimo na Nsengimana Joseph uherutse kurahirira kuyiyobora asimbuye Twagirayezu Gaspard.
Dr Murigande yasobanuye kw’impamvu, ari uko uburezi bufatwa nk’inyingi ikomeye y’iterambere ry’u Rwanda, kandi iryo terambera rikaba ridashoboka udafitemo ubuyobozi bwiza.
Ati” Impamvu ni uko ubuyobozi bw’u Rwanda bwemera ko uburezi ari inkingi ikomeye y’iterambere. Nta terambere rishoboka udafite uburezi bwiza, burera abantu bazakora imirimo, abazatekereza ku bibazo ufite, bakabibonera ibisubizo bakanabishyira mu bikorwa”.
Yakomeje avuga ko abayobozi bahindurwa hagambiriwe kubona uwabageza vuba kumakiriro biteze ku rwego rw’uburezi, ati “Kuba ari urwego rufite agaciro gakomeye n’uruhare rukomeye ni icya mbere gituma habaho impinduka nyinshi.
Iyo igihugu giteze ibyo ku rwego rw’uburezi ntibiboneke, ntabwo gitegeraza ngo ahari aho bizaza, kirahindura, kikavuga ngo ahari niduhindura turabona ubitugezaho vuba”.
