Amakipe y’Igihugu y’u Rwanda muri Handball y’abatarengeje imyaka 18 na 20 yegukanye irushanwa rya Men’s IHF Trophy Africa/Zone 5, abona itike yo gukina igikombe cya Afurika.
Ikipe y’u Rwanda y’abatarengeje imyaka 18 yegukanye iri rushanwa nyuma yo gutsinda u Burundi ibitego 39-38 ku mukino wa nyuma w’ishiraniro wabereye i Addis Ababa muri Ethiopia, kuri uyu wa Kane tariki ya 7 Gicurasi 2026.
Ni mu gihe kuri uyu wa Gatanu tariki ya 8 Gicurasi 2026, iy’abatarengeje imyaka 20 na yo yatsinze Ethiopia ibitego 39-37 mu mukino wa nyuma yegukana iri rushanwa.
Amakipe yombi yahise abona itike yo kwerekeza mu gikombe cya Afurika kizabera i Abidjan muri Côte d’Ivoire muri Nzeri 2026.
Aya makipe y’Igihugu y’u Rwanda yose yari yabonye itike yo gukina umukino wa nyuma amaze gusezerera Uganda na Kenya muri ½.
Amakipe yombi y’u Rwanda kandi yitwaye neza muri rusange kuko yari yasoje imikino y’amatsinda adatsinzwe ndetse ayayoboye, akaba arinze asoza iri rushanwa adatsinzwe umukino n’umwe.
