Police HC na APR HC zigiye kongera kugaruka mu kibuga mu mikino y’umunsi wa kane wa Shampiyona y’Icyiciro cya Mbere ya Handball mu bagabo, aho zombi zihatanira igikombe cya 2026/2027, mu gihe Police HC iyoboye urutonde naho APR HC ikiyihiga n’imikino ibiri y’ibirarane.
Iyi mikino iteganyijwe ku wa Gatandatu no ku Cyumweru, tariki ya 21 n’iya 22 Ugushyingo 2026, kuri Petit Stade i Remera.
Police HC iyoboye urutonde n’amanota 12, imaze gutsinda imikino itandatu yose yakinnye. Iyi kipe imaze gutsinda ibitego 230, yinjizwa 121, ikaba iri imbere ya APR HC ifite amanota umunani.
APR HC na yo iracyafite umusaruro mwiza, kuko imikino ine imaze gukina yose yayitsinze. Iyi kipe yatsinze ibitego 128, yinjizwa 60, ikaba ifite imikino ibiri y’ibirarane ugereranyije na Police HC.
Mu mpera z’iki cyumweru, APR HC izakina imikino itatu. Ku wa Gatandatu izahura na Nyakabanda HC saa 11:00, ku Cyumweru ihure na GS Tabagwe HC saa 10:45, mbere yo gusoza ihura na Gicumbi HT saa 18:00.
Gicumbi HT iri ku mwanya wa gatatu n’amanota umunani mu mikino itanu imaze gukina, na yo ikaba iri mu makipe ahatanira imyanya yo hejuru ku rutonde rwa shampiyona.
Ku rundi ruhande, Police HC izakina imikino ibiri ku Cyumweru. Saa 12:30 izahura na Musanze HC, mbere yo gukina na ADEGI HC saa 16:15.
Kuri Police HC, iyi mikino ni amahirwe yo gukomeza kuyobora shampiyona no kongera intera iri hagati yayo na APR HC, nubwo iyi kipe y’ingabo z’igihugu ifite imikino ibiri y’ibirarane ishobora kuyifasha kugabanya ikinyuranyo.
Shampiyona y’abagore igiye gutangira
Mu cyiciro cy’abagore, amakipe umunani na yo agiye gutangira guhatanira igikombe cya shampiyona ya 2026/2027.
ES SC Nyamagabe HBC, ifite igikombe giheruka, izahatana na Kiziguro SS HBC, UR-Rukara HBC, ISF Nyamasheke, UOK, UR-Huye HBC, Bridge HC na Apapegi Cyuru TSS.
Iyi shampiyona igiye gutangira nyuma y’uko Ikipe y’Igihugu y’u Rwanda mu bagore yitabiriye ku nshuro ya mbere irushanwa rya Women’s IHF Nations Trophy 2026, mu itsinda rya Zone V muri Afurika, ryabereye muri Tanzania kuva ku wa 4 kugeza ku wa 8 Ugushyingo.
U Rwanda rwitwaye neza mu mikino y’amatsinda, rutsinda Djibouti na Tanzania yari yakiriye irushanwa, rurangiza ku mwanya wa mbere mu itsinda B rubona itike ya ½ cy’irangiza.
Kimwe n’icyiciro cy’abagabo, mu bagore amakipe ane ya mbere ni yo azabona itike yo gukina imikino ya kamarampaka (Playoffs), izagena ikipe izegukana igikombe cya shampiyona.











