Mu gihe Shampiyona y’Isi y’amagare irimbanyije i Kigali, uko abasiganwa bazenguruka umujyi, mu kirere hagaragara indege za kajugujugu,ku butaka naho hari imbangukiragutabara ndetse na moto byose bigamije gutanga ubutabazi bw’ibanze mu gihe haba hari ugize ikibazo.
Mu nzira abari mu isiganwa banyuramo, hagaragara abakozi batandukanye bari mu bikorwa by’ubuvuzi barangajwe imbere na Minisiteri y’ubuzima.
MINISANTE ivuga ko ari mu rwego rwo gutanga serivisi z’ubuzima zinoze ku bitabiriye irushanwa bose, baba abakinnyi ndetse n’abatrage bari gufana.
Aba barimo abaganga b’inzobere zivuye mu bitaro bikuru by’igihugu, abakozi b’umuryango utabara imbabare Croix Rouge, ndetse n’abandi bahawe izi nshingano.
Abari mu isiganwa baherekezwa n’imbangukirgutabara irimo abaganga b’inzobere, na moto ikoreshwa nka ‘ambulance’ bigenda bikurikiye abakinnyi kugirango ukeneye ubutabazi abubone mu buryo bwihuse.
Mu kirere haba hari indege ya kajugujugu nayo ibakurikira aho banyuze hose.
Iyi ikaba yiteguye gutanga umusanzu aho ifasha mu buryo bwihuse kugeza kwa muganga uwagize ikibazo
Hari kwifashishwa kandi ivuriro ryimukanwa rizwi nka Mobile Clinic, ririmo ibikoresho byose bikenewe.
Umuganga muri Minisiteri y’Ubuzima, Dr. Ishema Leandre, akaba n’umwe mu bshinzwe serivisi z’ubuvuzi muri iri siganwa ry’amagare, avuga ku bufatanye na Polisi y’Igihugu, urubyiruko rw’abakorerabushake na croix rouge bari gutanga ubutabazi bw’ibanze kandi kuri bose.
Ati “Serivisi turi gutanga ni serivsi z’ubuzima rusange, si ku banyarwanda gusa ahubwo n’abanyamahanga baje gushyigikira bagenzi babo.”
Akomeza agira ati “Ariko ntabwo bigarukira aho, tunatanga serivisi z’ibanze ku bari gusiganwa bagize ikibazo cy’ubuzima cyangwa impanuka.”
Yauze ko kugeza ubu nta bibazo bikomeye barakira. Ariko n’iyo byaba biteguye gutanga ubufasha bukwiye.
Ati“ Haza abantu basanzwe bafite ibibazo nk’umuntu usanzwe afite umuvuduko tukamufasha.”
Avuga kandi ko hari abafana baba bababara umutwe kubera kuvuga cyane, abananiwe kubera guhagarara n’abagize ikibazo cy’isukari nkeya
Ahantu 14 mu mujyi wa Kigali hashyizwe imbanguiragutabara (ambulance) zifite abaganga n’ibikoresho byose by’ibanze, Serivisi z’ubuzima zisanzwe nazo zirakomeza ahandi hose, yaba ku bigo Nderabuzima ndetse no ku Bitaro .
