Ikigo cy’Igihugu cy’Ibarurishamibare mu Rwanda (NISR) cyatangaje ko ibiciro by’ibicuruzwa ku masoko mu mujyi cyazamutse ku kigero cya 7.1%, mu kwezi k’Ukwakira 2025, ugereranyije n’Ukwakira 2024.
Ni ibikubiye muri raporo y’igipimo cy’ihindagurika ry’ibiciro yagiye hanze kuri uyu wa Mbere, tariki ya 10 Ugushyingo 2025.
Iyi raporo igaragaza ko mu kwezi ku Kwakira 2025, ibiciro mu mijyi byiyongereyeho 7,1% ugereranyije n’u Kwakira ku mwaka ushize ndetse byiyongeraho 0.2% ugereranyije na Nzeri 2025.
Iri yongera ry’ibiciro ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,6%, ibiciro by’ibinyobwa bisembuye n’itabi byiyongereyeho 16%, ibiciro by’amazu, amazi, amashanyarazi, gazi n’ibindi bicanwa byiyongereyeho 7,5%, ibijyanye n’ubuvuzi byiyongereyeho 71,3%, ibijyanye n’ubwikorezi byiyongeraho 8,5% naho amafunguro n’icumbi byiyongereyeho 19,1%.
Ugereranyije Ukwakira 2025 n’Ukwakira 2024, ibiciro by’ibitari ibiribwa n’ibikomoka ku ngufu byiyongereyeho 9%, ni mu gihe Ukwakira na Nzeri 2025, ibiciro byiyongereyeho 1,3%.
Mu Kwakira 2025, ibiciro mu byaro byiyongereyeho 3,8% ugereranyije n’Ukwakira umwaka ushize wa 2024, ni mu gihe mu kwezi kwa Nzeri 2025 byari byiyongereyeho 5,5%.
Ibiciro bikomatanyirije hamwe mu Kwakira 2025, byiyongereyeho 5,1% ugereranyije n’Ukwakira 2024, ni mu gihe ugereranyije na Nzeri byiyongereyeho 1.1%.
Ugereranyije Ukwakira na Nzeri 2025, ibiciro byiyongereyeho 1%, iri zamuka rikaba ryaratewe ahanini n’ibiciro by’ibiribwa n’ibinyobwa bidasembuye byiyongereyeho 0,7% n’iby’amazu, amazi, amashanyarazi, gazi n’ibindi bicanwa byiyongereyeho 2,8%.
