Mu ijoro ryo ku wa gatanu tariki ya 13 Ukuboza 2024, mu nyubako ya BK Arena, habereye ibirori byakataraboneka byo gutanga ibihembo bikomeye ku bakinnyi bitwaye neza mu isiganwa mpuzamahanga ry’imodoka rya Formula One Grand Prix 2024.
Ni inshuro ya mbere ibi birori byari bibereye mu Rwanda, yewe no ku mugabane wa Afurika, bisize amateka mu rw’imisozi igihumbi, haba ku bashyitsi n’Abanyarwanda babihaye ijisho, bibe imbonankubone cyangwa kuri Televiziyo.
Abanyacyubahiro batandukanye bitabiriye uyu muhango barimo Perezida wa Repubulika, Paul Kagame, Umuyobozi w’Ishyirahamwe ry’Umukino wo Gusiganwa mu Modoka ku Isi, Mohammed Ben Sulayem, rurangiranwa Steve Harvey n’abandi.
Ibihe bidasanzwe byaranze ibirori bya FIA
Mbere y’uko ibirori bitangira Max Verstappen wahize abandi muri Formula ya 2024, yabanje gukora igihano yahawe na FIA, cyo gukora imirimo ifitiye rubanda akamaro yasabwe gukorera mu Rwanda, aho yaganirije abana bakiri bato biyumvamo imikino yo gusiganwa mu modoka, ndetse yakoze n’igerageza ry’imodoka ya ‘Cross Car’ yakozwe n’abanyeshuri ba IPRC.
Ubwo abayobozi batandukanye binjiraga mu nyubako ya BK Arena, umunyamakuru Naomi Schiff yakiriye Perezida Kagame amubaza icyo atekereza ku kuba u Rwanda ari ruto, ariko rukaba rwakiriye igikorwa cyo ku rwego rw’Isi.
Perezida Kagame yamuhamirije ko u Rwanda atari ruto ugereranyije n’ubushobozi rufite bwo gutegura imishinga minini, ati” Ntituri bato ku kintu na kimwe, ibyo turabyizera. Twizerera ko hari ibyo dushobora gukora, cyane cyane ibyo twakorana n’inshuti, abafatanyabikorwa, no kubakira ku byo dusanzwe dufite. Izo ni intego ndetse n’ubushobozi dufite bwo gukora imishinga iremereye nk’iyi.”
Muri uyu muhango hatanzwe ibihembo ku bitwaye neza, mu byiciro 16 birimo Shampiyona y’Isi ya Karting, Rally-Raid, Formula 2, Rally, Formula E, Endurance na Rallycross.
Mu bihembo by’uyu mwaka hari hiyongereyemo guhemba abakinnyi bitwaye neza ku gikorwa cy’umwaka bakoze, nyuma y’uko bisabwe n’abafana ba Formula One ku mbuga nkoranyambaga.
Igihembo cy’umunyabigwi w’ibihe byose ‘FIA Lifetime Achievement’, cyahawe umunya-Grasse, Michèle Mouton, umaze imyaka 50 asiganwa, aho yashimiwe mu mashyi n’abari bateraniye muri BK Arena, igihembo cye akigezwaho n’umuyobozi wa FIA, Mohammed Ben Sulayem.
Perezida Paul Kagame niwe washyikirije igihembo Umuholandi Max Verstappen wegukanye Formula One ya 2024. Verstappen yegukanye iki gihembo ku nshuro ya kane yikurikiranye, n’inshuro ya karindwi muri rusanjye, ahigitse Lando Norris wabaye uwa kabiri na Charles Leclerc wabaye uwa gatatu.
Perezida Kagame yongeye gushyikiriza igihembo ikipe ya McLaren, iyoborwa na Zak Brown, nk’ikipe nziza y’umwaka wa 2024.
Icyiciro cy’imodoka cyahize izindi mu kuba amakipe azikoresha yaritwaye neza mu masiganwa ni TOYOTA GAZOO, yakoreshejwe muri Shampiyona y’Isi ya Rally, Rally- Raid na Endurance.
Muri uyu muhango abantu batundakanye bahawe umwanya wo kugeza ubutumwa ku bakurikiye ibi birori barimo Abanyarwanda, Mukazayire Nelly, Umuyobozi wungirije wa RDB, wagaragaje bimwe mu bikorwa Abashyitsi bashobora gusura mu gihe bari mu Rwanda.
Queen Kalimpinya uzwi mu masiganwa ya Rally mu Rwanda nawe yahawe umwanya, agaragaza amarangamutima ye mu kuba u Rwanda rwarahawe kwakira itangwa ry’ibihembo bya FIA, Abanyarwanda nabo bakagira amahirwe yo kureba abakinnyi bakomeye muri iri siganwa imbonankubone.
Abitabiriye ibi birori basusurikijwe n’Intore z’u Rwanda n’umuhanzikazi Boukuru, mu gihe uwari uyoboye ibirori ari Makeda Mahadeo na Neil Cole.
