Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi, NAEB, cyatangaje ko kuva ku wa 4 kugera ku wa 8 Gicurasi 2026, ibikomoka ku buhinzi n’ubworozi byoherejwe mu mahanga byinjirije u Rwanda arenga miliyari 14,1 Frw, avuye muri toni 9.352 toni.
Ibi byatangajwe muri raporo y’icyumweru ya NAEB igaragaza uko ibikomoka ku buhinzi n’ubworozi byoherejwe hanze n’amafaranga byinjije.
NAEB yerekanye ko Ikawa yoherejwe mu mahanga ari toni 194 zinjije miliyari 1,2 Frw, mu gihe icyayi cyoherejwe ku isoko mpuzamahanga ari toni 1027, cyinjije miliyari 4,2 Frw naho imboga ni toni 274 zinjije miliyoni 736 Frw.
Imbuto zagurishijwe mu minsi itanu zari toni 456, zinjirije igihugu miliyoni 445 Frw, indabo zigera kuri toni 15, zaguzwe miliyoni 117 Frw mu gihe Ibihingwa bitandukanye nk’ibinyabijumba, ibinyamisogwe, ibinyampeke n’ibindi byagurishijwe ari toni 6954, byinjije arenga miliyari 6 Frw.
Amatungo n’ibiyakomokaho byagurishijwe ni toni 432 Frw byinjije miliyari 1,2 Frw.
Ibihugu byaguze ibikomoka ku buhinzi n’ubworozi by’u Rwanda ni u Bwongereza, u Buholandi, u Bufaransa, u Bushinwa, u Budage, Leta zunze ubumwe z’Abarabu, Nigeria n’Ibihugu byo ku Mugabane wa Afurika.
