Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi NAEB, cyatangaje ko umusaruro ukomoka ku buhinzi n’ubworozi woherejwe ku masoko mpuzamahanga kuva ku wa 13 kugera kuri 17 Mata 2026 byinjirije u Rwanda miliyari 14,6 Frw mu minsi itanu.
Ibi byatangajwe muri raporo y’icyumweru itangazwa na NAEB igaragaza uko ibikomoka ku buhinzi n’ubworozi byoherejwe ku masoko yo hanze n’amafaranga byinjije.
NAEB yatangaje ko umusaruro woherejwe ku isoko mpuzamahanga muri iyo minsi itanu ari toni 9793, zirimo; ikawa, icyayi, imboga, imbuto, indabo n’ibindi bitandukanye.
Hoherejwe toni 137 z’ikawa zinjije miliyoni 713 Frw, hoherezwa toni 1135 z’icyayi zinjije miliyari 4.7 Frw. Ni mu gihe kandi hoherejwe imboga zipima toni 298 zinjije miliyoni 799 Frw.
Imbuto u Rwanda rwohereje ku isoko mpuzamahanga muri iyo minsi itanu zipima toni 259, zinjije miliyoni 188 Frw, naho indabo zoherejwe ni toni 11 zagurishijwe miliyoni 88 Frw.
Ibihingwa bitandukanye (ibinyabijumba, ibinyamisogwe, ibinyampeke n’ibindi) u Rwanda rwoherejwe ibipima toni 7598, birwinjiriza miliyari 7 Frw.
Ku bijyanye n’amatungo n’ibiyakomokaho hoherejwe ibipima toni 355, aho byinjirije u Rwanda asaga miliyoni 957 Frw.
NAEB yagaragaje ko muri rusange umusaruro w’ibikomoka ku buhinzi n’ubworozi woherejwe ku masoko mpuzamahanga wagurishijwe mu bihugu birimo u Bwongereza, u Buholandi, u Bufaransa, Leta Zunze Ubumwe z’Abarabu, u Budage, Nigeria n’ibihugu byo ku Mugabane wa Afurika.
