“Ku kijyanye na performance ntacyo wabagereranya nacyo. Biragoye kugira ngo bazagaruke, agahinda bajyanye, kugira ngo bazaze sinzi. Ni ukubereka ko amafaranga ya hoteli, aho kurara, icyo kurya byose byishyuwe mbere nta bintu by’ibice.”
Aya magambo ni ay’umwe mu bitabiriye igitaramo Itsinda riramya rikanahimbaza Imana rya Joyous Celebration riheruka gukorera muri BK Arena, ku wa 29 Ukuboza 2024.
Igitaramo cy’iri tsinda rikomoka muri Afurika y’Epfo kigitangazwa, benshi mu bakuze barota kuribona ribataramira bariruhukije kuko bumvaga ko inzozi zabo zigiye kuba impamo.
Iki gitaramo cyiswe “Joyous Celebration Live in Kigali Concert”, cyanatumiwemo Alarm Ministries na Gentil Misigaro ari na bo bihariye igihe kinini ku rubyiniro.
Joyous Celebration yari yiteguye ko izaririmba ikimara ipfa ntiyahiriwe no gutaramira abakunzi bayo bo mu Rwanda n’abandi bari bavuye mu bihugu bitandukanye.
Abayobozi b’iyi korali ubwo bari bamaze kuririmba indirimbo zigera kuri enye, bashimiye abakunzi babo ariko bagaragaza ko batashye batanyuzwe, bafite akangononwa.
Umwe muri bo yabwiye imbaga igerereye yari muri BK Arena ko habaye ibibazo bitandukanye byatumye bataririmba nk’uko byari biteganyijwe, ati “Sinzi niba bababwije ukuri ku byabaye ariko kubera ibibazo byabaye twavuganye na bamwe mu baramyi muri iki gihugu, bazadutegurire tuze bimeze neza, dukore ibi.”
Yavuze ko bagomba kwihuta bajya ku Kibuga Mpuzamahanga cy’Indege cya Kigali i Kanombe kuko bari bafite igitaramo mu Mujyi wa Durban.
Umunota.com wamenye ko ikibazo cyabayeho ari icyo kutishyurwa kwa hoteli iyi korali yari icumbitsemo mu Mujyi wa Kigali bituma batinda kuyivamo.
Andi makuru avuga ko Joyous Celebration yari itarahabwa amafaranga yose yemerewe igasaba kubanza kwishyurwa mbere yo kuririmba.
Mbere byari byatangajwe ko igitaramo kizatangira saa Cyenda ariko cyatangiye ahagana saa Kumi n’Ebyiri z’umugoroba.
Umunsi wari utegerejwe na benshi waje guhinduka ishavu kuri bamwe nyuma y’uko Joyous Celebration iririmbye indirimbo mbarwa.
Umunsi uzaba mubi uboneka bugicya. Kuva iyi korali itangiye urugendo rwayo rwerekeza i Kigali yagowe n’ikirere bituma amasaha yagombaga kuhagerera yiyongeraho kuko indege yakererewe.
Ibi byanakomeje kugira ingaruka ku habereye ikiganiro n’itangazamakuru hahinduwe ku mpamvu zitaramenyakana, gusa muri BK Arena hari hamaze kubera igitaramo cy’Abanya-Nigeria Ruger na Victony.
Icyo gitaramo ni cyo cyanatumye bakora imyitozo ya nyuma yo gusuzuma ibikoresho [sound check] ku Cyumweru, bakoze kuri uwo munsi, ahagana saa Munani ubwo abantu ba mbere bari batangiye kugera kuri BK Arena.
Nubwo Joyous Celebration yaririmbye indirimbo nke, ubuke bwazo ntibwakuyeho ubwiza bwazo no guhembuka kw’abitabiriye igitaramo cyayo mu gihe gito yamaze ku rubyiniro.
Imigendekere irimo inenge y’iki gitaramo yananenzwe n’itsinda ry’abafana ba Joyous Celebration ryagaragaje ko ritanyuzwe n’uburyo ryakoze ingendo ndende ariko rigataha ritanyuzwe.
Mu itangazo ryashyize hanze ryanenze Sion Communications na Zaburi Nshya Events bateguye igitaramo, rigaragaza ko ari ikimwaro kuri bo.
Ryagize riti “Byari ugutesha agaciro abafana ba Joyous Celebration. Ni gute muzana korali ivuye muri Afurika y’Epfo kuririmba indirimbo zitageze ku 10? Abantu bigomwe igihe cyabo, amafaranga bava mu bihugu byabo nka Kenya, Tanzania, Uganda, Botswana, Angola, Burundi na Congo, bitabiriye igitaramo.”
Bagaragaje ko bagenze amasaha arenga 26 ngo barebe Joyous Celebration, ariko ntibabona icyo bishyuriye.
Joyous Celebration yageze ku rubyiniro 21:11, yaririmbye indirimbo zirimo “Bengingazi”, “Useyabuya Baba” na “Malilongwe”. Iri tsinda ryashinzwe mu 1994, ryanishimiwe cyane mu ndirimbo “Tuguhaye Icyubahiro” ryasubiyemo mbere yo kuva ku rubyiniro saa 22:15.
