Kuri uyu wa Mbere tariki 31 Kanama 2026 nibwo irushanwa rihuza amakipe yabaye aya mbere iwayo muri Afurika y’Iburasirazuba no Hagati (CECAFA), yishakamo ikipe izahagararira aka karere mu mikino Nyafurika ihuza amakipe yabaye aya mbere iwayo (CAF Women’s Champions League), ryashyizweho akadomo.
Iri rushanwa ryabereye bwa mbere mu Rwanda, ryagukanwe n’ikipe ya Kawempe Muslim Ladies FC yo muri Uganda ndetse ibona n’itike yo kuzakina CAF Women’s Champions League nyuma yo gutsinda Kenya Police Bullets WFC yo muri Kenya igitego 1-0.
Ni mu gihe umwanya wa Gatatu wegukanwe n’ikipe ya Commercial Bank of Ethiopia (CBE) itsinze Yei Joint Stars yo muri Sudani y’Epfo ibitego 6-1.
Agnes Nabukenya wafashije ikipe ye ya Kawempe Muslim Ladies kwegukana igikombe, yahawe igihembo cy’umukinnyi mwiza w’irushanwa.
Emush Daniel Dandamo ukinira CBE WFC we yahawe igihembo cy’umukinnyi watsinze ibitego byinshi nyuma yo gutsinda ibitego 6.
Ni mu gihe Saidah Namwanje ukinira Kawempe Muslim Ladies yahembwe nk’umuzamu mwiza w’irushanwa naho ikipe ya Yei Joint Stars FC ihabwa igihembo cy’ikipe yaranzwe n’imico myiza (Fair Play Award).
Dore imibare yihariye ya CECAFA y’abagore yaberaga mu Rwanda ku nshuro ya mbere
CECAFA y’abagore y’uyu mwaka yatangiye gukinwa tariki 21 Kanama isozwa tariki 31 Kanama 2026, yitabirwa n’amakipe 10 yabaye aya mbere mu bihugu byayo, aho u Rwanda rwari ruhagarariwe na Rayon Sports WFC yatwaye igikombe cya Shampiyona.
Muri iri rushanwa hakinwe imikino 16, harimo 14 yakiniwe kuri Kigali Pele Stadium mu gihe indi mikino ibiri yakiniwe ku kibuga kiri kuri Hotel y’Ishyirahamwe ry’Umupira w’Amaguru mu Rwanda, FERWAFA, i Remera.
Muri iyi mikino yose habonetsemo ibitego 63, ibi bivuze ko ushyize ku mpuzandengo byibuze buri mukino wabonekagamo ibitego 3.9 bigaragaza ko ari irushanwa ryarumbutsemo ibitego.
Umukino wabonetsemo ibitego byinshi ni uwo mu Itsinda B, CBE yo muri Ethiopia yatsinzemo FC Ujeco yo muri Djibouti ibitego 11-0, mu gihe uwabonetsemo bike ari uwo mu itsinda A, Rayon Sports yanganyijemo na Mafunzo SC yo muri Zanzibar 0-0.
Ikipe yinjije ibitego byinshi mu izamu ni CBE yinjije 17, mu gihe FC Ujeco yo muri Djibouti na Denden WFC yo muri Eritrea zitabashije kwinjiza igitego na kimwe.
Kawempe Muslim Ladies niyo yagize ubwugarizi bwiza kuko yarinze irangiza irushanwa itinjijwe igitego na kimwe, mu gihe yo yinjije ibitego 13, ibi biyigira n’ikipe ya mbere yizigamye ibitego byinshi muri iri rushanwa ryose muri rusange.
Ni ku nshuro ya kabiri ikipe ya Kenya Police Bullets yari itsindiwe ku mukino wa nyuma, kuko yaherukaga kuhatsindirwa na CBE muri 2024. Ibi bituma ikipe ya Vihiga Queens ariyo yonyine yo muri Kenya imaze kwegukana iki gikombe kuva cyatangira gukinwa mu 2021.
Ni ubwa mbere ikipe yo muri Uganda yegukanye iki gikombe nyuma ya She Corporate WFC yari yabigerageje muri 2022, ariko igatsindirwa ku mukino wa nyuma na Simba Queens yo muri Tanzania.
CBE iracyafite agahigo ko kuba ariyo kipe yageze ku mukino wa nyuma inshuro nyinshi kuko yahageze inshuro 3, ibasha kwegukana igikombe inshuro imwe muri 2024, ndetse isangiye agahigo na Yei Joint Star ko kuba arizo kipe zitarasiba na rimwe iri rushanwa.
Rayon Sports y’abagore n’ubwo bitayikundiye mu irushanwa ry’uyu mwaka igasezerwa mu matsinda, niyo kipe yo mu Rwanda igifite agahigo ko kuba yarageze kure muri iri rushanwa kuko umwaka ushize yari yatsindiwe ku mukino wa nyuma.
