Repubulika Iharanira Demokarasi ya Congo n’Ihuriro rya AFC/M23 basubiye i Doha muri Qatar mu rwego rwo kugira ngo basinye amahame aganisha ku masezerano y’amahoro.
Ni amakuru yavuzwe mu itangazo rihuriweho ryasohowe n’urwego rw’ububanyi n’Amahanga rwa Leta Zunze Ubumwe za Amerika.
Iri tangazo rikaba ryasohowe nyuma y’inama ya gatatu y’abahagarariye u Rwanda, RDC n’abahuza yo gukurikirana iyubahirizwa ry’amasezerano y’amahoro yasinyiwe i Washington DC muri Nzeri uyu mwaka.
Uru rwego rwavuze ko Qatar yamenyesheje ibihugu ko tariki ya 06 Ukwakira 2025, intumwa z’u Rwanda n’iza Repubulika ya Demokarasi ya Congo ndetse n’iza AFC/M23 zizasubukura ibiganiro.
Ikavuga kandi ko ibi biganiro bizibanda cyane kunoza amasezerano y’ubwumvikane mu guhererekanya imfungwa yasinywe tariki ya 19 Nzeri 2025.
AFC/M23 igaragaza ko leta ya RDCongo ifunze abantu bayo barenga 700, ko kandi abo bagomba kurekurwa na RDC ikavuga ko AFC/M23 ifite imfungwa nabo bagomba kurekurwa.
Biteganyijwe ko komite mpuzamahanga y’umuryango wa Croix-Rouge izaba umuhuza mu bikorwa byo gushakisha imfungwa za buri ruhande,kuzigenzura no kuzirekura.
Gusa hari impungenge z’uko amasezerano y’amahoro atazasinywa hagati ya RDC na AFC/M23 ahanini bitewe n’ibirimo kubera ku kibuga cy’imirwano.
Major Gen Sultan Makenga ubushize yabwiye abasirikare bashya baheruka kwinjizwa muri AFC/M23,ko intego ya M23/ARC ari ugukuraho ubutegetsi bwa Felix Tshisekedi ikabohora RDC.
Perezida Tshisekedi,nawe ubwo yaganiraga n’urubyiruko i Kinshasa tariki ya 04 Ukwakira 2025,yagaragaje ko afite intego yo kwisubiza ibice byafashwe n’abarwanyi ba AFC/M23 birimo umujyi wa Goma,Bukavu.
