Uyu wa gatanu, tariki ya 15 Kanama 2025, ni umunsi mukuru wa ‘Rayon Day’ biteganyijwe ko mu rwego rwo kwizihiza uyu munsi ikipe ya Rayon Sports iri buhure n’ikipe ya Young Africans SC yo muri Tanzania, mu mukino wa Gishuti utegerejwe ku isaha ya saa 18:00 z’umugoroba.
Ku munota wa mbere w'umukino ikipe ya Rayon Sports ifunguye amazamu ku ikosa rikomeye rikozwe n'umuzamu wa Yanga Africans Jigui Diarra
Abakinnyi b'amakipe yombi: Rayon Sports na Yanga Africans basohotse mu rwambariro aho bagiye gucakirana mu mukino wa gishuti wo ku munsi wa 'Rayon Day'
Umukino urabura iminota micye ngo utangire, abashyushyarugamba Faustinho Simbigarukaho ndetse na Wasiri barimo gusoma amazina y'abakinnyi bari bubanzemo ku mpande zombi
Rayon Sports yerekanye abakinnyi ndetse n'abatoza izakoresha mu mwaka w'imikino 2025/2026, Ni ikipe iyobowe n'umutoza mukuru Afhamia Lotif ndetse n'abakinnyi barimo Bigirimana Abed, Niyonzima Olivier Seifu n'abandi batandukanye.
Ikipe y'abagore ya Rayon Sports Women Fc imaze kwerekanwa, n'ikipe yaserutse iyobowe n'umutoza mukuru wayo Rwaka Claude.
Ikibuga cyo gukiniramo kimaze gusukurwa hitegurwa umukino ugiye guhuza Rayon Sports FC n'ikipe ya Yanga Africans FC ugiye kuberamo
Abakinnyi bakomeje kugwira muri Stade Amahoro aho bari kugirira ibihe byiza bizihizanya na Rayon Sports umunsi mukuru wa 'Rayon Day'
Guhera saa 10h00', abakunzi ba Rayon Sports bari batangiye kwinjjira muri Stade Amahoro.
N'iyonka, ntiyasigaye.
ABA-RAYON NIBWO TWAZA!!!🔊 Iyi niyo mvugo ku mbuga nkoranyambaga za Rayon Sports FC. Abafana batangiye kugera kuri Stade Amahoro.
Abanya-Kigali n'abaturutse hanze yayo babukereye aho bari kwerekeza muri Sitade Amahoro ahagiye kwizihirizwa umunsi mukuru wa 'Rayon Day', hateganyijwe umukino wa gishuti uri buhuze Rayon Sports n'ikipe ya Young Africans yo muri Tanzania.
Wa munsi wageze!
Uyu wa gatanu, tariki ya 15 Kanama 2025, ni umunsi mukuru wa 'Rayon Day' biteganyijwe ko mu rwego rwo kwizihiza uyu munsi ikipe ya Rayon Sports iri buhure n'ikipe ya Young SC yo muri Tanzania, mu mukino wa Gishuti utegerejwe ku isaha ya saa 18:00 z'umugoroba.
Ni umukino ikipe ya Rayon Sports ivuga ko yiteguye ko iza kuhacana umucyo nk'uko babigarutseho mu kiganiro bagiranye n'itangazamakuru ku munsi w'ejo tariki ya 14 Kanama 2025.
Bigirimana Abed ukinira ikipe ya Rayon Sports hagati yavuze ko nta bwoba bafitiye ikipe ya Yanga Africans SC.
Ati" Yanga Africans turayubaha ariko ntabwo tuyitinya."
Ku munsi w'ejo hashize ninabwo iyi kipe ya Young Africans SC yakoze imyitozo ya nyuma kuri Stade Amahoro, ndetse bitunguranye hagaragayemo umukinnyi Haruna Niyonzima wanyuze muri iyi kipe mu myaka yashize.
Haruna yakinnye muri iyi kipe yo muri Tanzania kuva muri 2011 kugeza muri 2017, yongera kuyisubiramo mu 2020 kugeza muri 2021, akaba yongeye kugaragara mu myitozo yayo aho igiye guhura na Rayon Sports mu mukino wa gishuti.
Rayon Sports yatangaje ko kuri uyu munsi ihishiye abakunzi bayo byinshi birimo imyidagaduro, kwerekana abakinnyi bashya ndetse n'umukino w'abayobozi bayoboye Rayon Sports.
