Umunyamabanga Mukuru w’Umuryango w’Ibihugu bivuga Ururimi rw’Igifaransa (OIF), Louise Mushikiwabo, yaganiriye na Minisitiri w’Ububanyi n’Amahanga w’u Rwanda, Amb. Olivier Nduhungirehe.
Ni amakuru yatangajwe n’urubuga rwa Francophonie, kuri X, kuri uyu wa Gatatu, tariki ya 29 Ukwakira 2025.
Ibiganiro bya Louise Mushikiwabo, na Minisitiri Amb. Nduhungirehe byibanze ku gutegura neza Inama ya 47 y’Abaminisitiri b’Ububanyi n’Amahanga bo muri Francophonie, izabera mu Rwanda.
Iyi nama izahuriza hamwe aba Minisitiri b’Ububanyi n’Amahanga bo mu bihugu bivuga ururimi rw’Igifaransa izabera i Kigali ku wa 19 na 20 Ugushyingo 2025.
Mu bazitabira iyi nama harimo Minisitiri w’Ububanyi n’Amahanga w’u Bubiligi, Maxime Prevot, uzaba aje mu Rwanda bwa mbere nyuma y’uko u Rwanda rucanye umubano n’u Bubiligi.
Iyi nama izaba ifite insanganyamatsiko zirebana n’iterambere ry’imibanire y’ibihugu bikoresha Igifaransa, ubufatanye mu bya politiki, ubukungu n’umuco, ndetse n’uruhare rwa Francophonie mu gukemura ibibazo byugarije Akarere n’Isi muri rusange.
Biteganyijwe ko iyi nama izitabirwa n’Abaminisitiri b’Ububanyi n’Amahanga baturutse mu bihugu byose bigize OIF, hamwe n’abayobozi bakuru b’iyi miryango mpuzamahanga.
