Abahanzi bamaze igihe kinini mu muziki nyarwanda, Massamba Intore na Alpha Rwirangira, basusurikije abanyarwanda n’abandi bitabiriye igitaramo cyabereye mu gihugu cya Canada, binyuze mu gikorwa cyiswe ‘Hope Day’, cyateguwe mu rwego rwo kwishimira urugendo rwiterambere ry’u Rwanda.
Iki gitaramo bahuriyemo cyabaye ku itariki ya 15 Nzeri 2024, mu mujyi wa Edmonton muri Canada ahitwa Canadian Druze Center. ‘Hope Day’ ni igikorwa kiba ngarukamwaka, gitegurwa hagamijwe kwizihiza ubudaheranwa bw’abarokotse Jenoside yakorewe abatutsi.
Iki gikorwa cyabaye umwanya mwiza wo kongera kuganira no kurebera hamwe ibibangamiye iterambere ry’abarokotse, mu rugendo rwo kubafasha gukomeza kwiyubaha, baharanira iterambere ry’ejo hazaza.
Massamba niwe wari umushyitsi mukuru muri iki gitaramo, ni mu gihe Alpha Rwirangira yari umusangwa kuko asanzwe abarizwa muri kiriya gihugu.
Iki gikorwa cyamaze umunsi wose, kuko cyatangijwe n’ibikorwa byabereye ahitwa Rundle Park, ni mu gihe igitaramo cy’aba bahanzi cyabaye guhera saa kumi n’ebyiri z’umugoroba.
