Minisitiri w’Ububanyi n’Amahanga w’u Rwanda, Amb. Olivier Nduhungirehe, yahuye n’Umunyamabanga Mukuru Wungirije w’Umuryango w’Abibumbye ushinzwe ibikorwa byo kubungabunga amahoro, Jean Pierre Lacroix, bagiranye ibiganiro byibanze ku bikorwa byo kubungabunga amahoro hirya no hino muri Afurika.
Icyo kiganiro cyabereye mu mujyi wa Algiers muri Algeria, ku ruhande rw’Inama ya 12 y’Abayobozi ba Afurika yiga ku bibazo by’umutekano n’uburyo bwo kubungabunga amahoro ku mugabane.
Minisitiri Amb. Nduhungirehe na Lacroix baganiriye ku ruhare rw’ibikorwa mpuzamahanga ndetse n’urw’Abanyafurika ubwabo mu gukomeza kubungabunga amahoro muri Afurika.
Ibiganiro byabo bibaye mu gihe ibihugu byinshi bya Afurika bikomeje guhura n’ibibazo by’umutekano mucye, bishingiye ahanini ku mitwe yitwaje intwaro ikomeje guteza umutekano muke mu bice bitandukanye.
Ibi bikaba bituma hakenerwa uruhare runini rw’Umuryango w’Abibumbye n’Umuryango wa Afurika Yunze Ubumwe mu bikorwa byo kubungabunga amahoro.
Kugeza ubu, u Rwanda ni kimwe mu bihugu biyoboye mu gutanga ingabo n’abapolisi mu butumwa bw’amahoro bwa Loni ku mugabane wa Afurika.
Mu mwaka wa 2025, u Rwanda rwohereje abagera kuri 5,905, barimo abasirikare basaga 4,600 n’abapolisi barenga 1,000, bakorera mu bihugu birimo Repubulika ya Santarafurika, Sudani na Mozambique.
Ibi bituma u Rwanda ruba ku mwanya wa kabiri mu bihugu bitanga ingabo n’abapolisi benshi mu butumwa bwo kubungabunga amahoro.
