Minisitiri w’Intebe, Dr Justin Nsengiyumva, yakiriye itsinda riyobowe na Leung Chun-Ying, Umuyobozi Mukuru wa GX Foundation, umuryango mpuzamahanga ukora ibikorwa by’ubugiraneza bigamije gutanga ubufasha mu rwego rw’ubuvuzi n’ubuzima rusange ku bihugu bikiri mu nzira y’amajyambere.
Minisitiri w’Intebe yakiriye uyu muyobozi ku Gicamunsi cyo kuri uyu wa Kane, tariki ya 15 Mutarama 2026, bagirana ibiganiro byibanze ku mahirwe y’imikoranire mu guteza imbere urwego rw’ubuzima mu Rwanda.
GX Foundation ni umuryango wigenga ukorera Hong Kong, mu Bushinwa, washinzwe mu 2018 ugamije gutanga ubufasha mu rwego rw’ubuvuzi n’ubuzima mu bihugu bikiri mu nzira y’Amajyambere.
Uyu muryango ufasha ibihugu binyuze muri gahunda yiswe ‘Belt and Road’, yatangijwe n’u Bushinwa mu mwaka wa 2013, igamije guteza imbere ubufatanye mu bijyanye n’ubukungu, ubucuruzi, ibikorwaremezo n’imibanire y’abaturage hagati y’iki gihugu n’ibindi byo ku migabane itandukanye.
Mu bikorwa byawo by’ingenzi, GX Foundation yibanda ku buryo bwo gukumira indwara zishobora kwirindwa nk’ubuhumyi buturuka ku ndwara z’amaso (cataract), kurwanya indwara ziterwa n’udukoko na virusi zitandukanye, kwimakaza isuku no kurwanya indwara zituruka ku isuku nke, ndetse no guhangana n’ibyago bishobora kugira ingaruka ku buzima.
Uyu muryango wita cyane ku kurengera ubuzima, binyuze mu gutanga amahugurwa, kugirana ubufatanye n’indi miryango mpuzamahanga ifite aho ihuriye n’ubuzima, gusangiza ubumenyi abaturage, no gukorana bya hafi n’ibihugu muri iyi gahunda.
Kugeza ubu, GX Foundation ikorera mu bihugu bitandukanye byo muri Aziya, Afurika no muri Amerika yo hagati, mu bihugu birimo Senegal, Mauritania, Djibouti, Cambodia, Laos, Honduras, Fiji na Vanuatu.
Uyu muryango ufite intego yo kwagura ibikorwa byayo no mu bindi bihugu hagamijwe gutanga umusanzu mu kuzamura ubuzima n’imibereho myiza y’abaturage.
U Rwanda rwinjiye mu bihugu bishobora kugirana imikoranire n’iki kigo hagamijwe kurushaho kuzamura ireme ry’imibereho myiza y’Abanyarwanda bigendanye n’icyerekezo cy’u Rwanda cya Gahunda y’Igihugu y’Iterambere, NST2.
