Minisitiri w’Intebe, Dr. Edouard Nsengiyumva, yakiriye itsinda riturutse mu Kigega cy’ishoramari cyo mu Bushinwa kizwi nka Silk Road Fund (SRF), riyobowe n’Umuyobozi Mukuru Zhu Jun, baganira ku mahirwe mashya y’ishoramari mu Rwanda, mu nzego zirimo ubuzima, ingufu, uburezi n’ubuhinzi.
Minisitiri w’Intebe yakiriye iri tsinda riturutse muri Silk Road Fund ku mugoroba wo kuri uyu wa Gatatu, tariki ya 18 Werurwe 2026.
Ibiganiro bagiranye byagarutse ku buryo bwo gukomeza guteza imbere ubufatanye hagati y’u Rwanda na Silk Road Fund, hibandwa ku gushora imari mu nzego zitandukanye zirimo ubuzima, ingufu, uburezi n’ubuhinzi, byose bigamije iterambere ry’ubukungu n’imibereho myiza y’abaturage.
Silk Road Fund ni ikigega cya leta y’u Bushinwa cyashyiriweho gushyigikira gahunda ya “Belt and Road Initiative” (BRI), igamije guteza imbere ubufatanye mu bukungu n’ubucuruzi hagati y’u Bushinwa n’ibindi bihugu binyuze mu kubaka ibikorwaremezo no koroshya ubuhahirane.
U Rwanda rwinjiye muri iyi gahunda mu 2018, ndetse rumaze kungukira mu mishinga itandukanye, hari ibikorwaremezo byubatswe birimo imihanda yo mu Mujyi wa Kigali irimo kuvugururwa ndetse n’imihanda ihuza uturere dutandukanye tw’igihugu nka Huye-Kibeho-Ngoma.
Mu bijyanye n’ingufu, hari imishinga nka Nyabarongo II Hydropower Plant igamije kongera ingufu z’amashanyarazi zikenerwa mu nganda no mu ngo.
Uretse ibyo kandi SRF ikomeje no korohereza ibigo by’u Bushinwa gushora imari mu Rwanda, binyuze mu bufatanye n’Urwego rw’Igihugu rw’Iterambere (RDB). Ibi byagize uruhare mu guteza imbere ibikorwa by’ubwubatsi n’ubukerarugendo, aho urugero rugaragara ari inyubako zirimo hoteli zikomeye i Kigali nka Marriott Hotel.
Mu bijyanye n’inganda, ubufatanye bw’u Rwanda na SRF bwagaragaye mu guteza imbere ibyanya by’inganda nka Bugesera na Rwamagana, hagamijwe kongera umusaruro w’ibikorerwa mu gihugu no guteza imbere ibyoherezwa mu mahanga.
