Ubuyobozi bwa Pariki y’Igihugu ya Nyungwe, butangaza ko amafaranga asaga miliyari 1.2 frw, yavuye mu bukerarugendo, azifashishwa mu gutera inkunga imishinga itandatu yo mu turere twegereye iyi pariki binyuze muri gahunda yo gusangira umusaruro wa pariki n’abayituriye.
Iyi mishinga yatoranyijwe n’Urwego rw’Igihugu rw’Iterambere, RDB, ku bufatanye n’ubuyobozi bwa Pariki n’ubuyobozi bw’inzego zibanze, bemeza ko imishinga yazaterwa inkunga irimo ibiri yo mu Karere ka Karongi, n’indi yo muri Rusizi, Nyamasheke, Nyaruguru na Nyamagabe.
Amafaranga azahabwa buri Karere; Nyamasheke ni miliyoni 375 Rwf, Rusizi ni miliyoni 228 Rwf, Nyamagabe ni miliyoni 268 Rwf, Nyaruguru ni miliyoni 268 Rwf, naho Karongi ni miliyoni 107 Rwf.
Iyi mishinga yatoranyijwe mu Ukuboza kwa 2025, yashyizwe mu ngengo y’imari ya RDB ya 2025/2026.
Umuyobozi wungirije ushinzwe ubukungu n’Imibereho myiza wo mu Karere ka Rusizi, Alfred Habimana, aganira na The New Times, yavuze ko amafaranga bahawe binyuze muri iyi gahunda yo gusangiza umusaruro uturuka mu bukerarugendo bwo mu mapariki abaturage bayakikije, yafashije mu mishinga y’ubuhinzi, ubworozi ndetse n’imiryango 32 ihabwa amazu yo kubamo.
Akomeza agira ati “Muri uyu mwaka, amafaranga azanakoreshwa mu kwagura Ikigo nderabuzima cya Rasano kugira ngo kijye gitanga serivisi zose zikenewe, bityo abaturage ntibagombe kugenda ibilometero 40 bashaka ubuvuzi.”
Umuyobozi wungirije ushinzwe iterambere ry’ ubukungu wo mu Karere ka Karongi, Julienne Ntakirutimana, nawe avuga ko iyi nkunga izakoreshwa mu gutanga ingurube 100 ku baturage bo mu Murenge wa Mutuntu ndetse no kubaka ibyumba bitatu by’amashuri mu Murenge wa Twumba.
Imibare y’Ikigo cy’Igihugu cy’Ibarurishamibare yo mu 2025 , yerekana ko umubare w’abasura Pariki ya Nyungwe wiyongereye cyane uva ku bakerarugendo 2,386 mu 2005, ugera ku 29,667 mu 2024, ndetse biyongera cyane nyuma y’uko iyi pariki ishyizwe mu Murage wa UNESCO mu 2023.
Umuyobozi ushinzwe umutungo muri Pariki ya Nyungwe, Protais Niyigaba, avuga ko muri uyu mwaka, iyi pariki yitezweho gukusanya asaga miliyoni 3.4 z’amadolari azava mu bukerarugendo.
Nk’uko umubare w’abasura wiyongera, amafaranga ava mu bukerarugendo na yo yariyongereye, bityo n’inkunga igenerwa abaturiye iyi pariki nayo iriyongera, iva kuri miliyoni 50 mu 2008 igera kuri miliyari 1.2 Rwf mu 2025.
Niyigaba avuga ko kuva iyi gahunda itangijwe mu 2005, miliyoni zirenga 4.5 Rwf zatanzwe muri iyi gahunda yo gutera inkunga imishinga y’iterambere y’abaturage baturiye pariki, ndetse bibatera imbaraga zo kwita no kurengera iyi pariki.
Ati “Iyi mishinga ikwiriye gutera ishema abaturage batuye mu nkengero za pariki no kubashishikariza kugira uruhare rugaragara mu kubungabunga ibidukikije.”
Visit Rwanda yagize uruhare rufatika mu guteza imbere ubukerarugendo
Kwiyongera kw’abasura Pariki ya Nyungwe byagizwemo uruhare na gahunda ya Visit Rwanda, ubu imaze kuba ikimenyabose.
Niyigaba avuga ko iyi gahunda itarangirira ku kwamamaza gusa, ahubwo ari igice cy’uburyo bwagutse bwo kwamamaza u Rwanda nk’ahantu h’ubukerarugendo butandukanye kandi bushimishije.
Ubukerarugendo muri pariki zo mu Rwanda kandi bwateye imbere binyuze mu bufatanye bwa RDB n’Ihuriro ry’amapariki muri Afurika, ( African Parks Network) , bwatumye hashyirwaho ikigo gishinzwe gucunga Pariki ya Nyungwe ( Nyungwe Management Company).
Mu bikorwa byakozwe harimo kubaka inzira yo mu kirere izwi nka “Canopy Walkway’, kubaka amaresitora yo ku rwego rwo hejuru nka Uwinka na Gisakura, hoteli ya Gisovu, inzira ndende yo kugenda n’amaguru (hiking trail) ya Cyinzobe, amarushanwa yo kugenda ku mugozi yitwa ‘Gisakura Rope Course’, umugozi wo mu kirere uzwi nka zipline, ari nayo ndende muri Afurika y’Iburasirazuba n’ibindi bitandukanye.
Iyi pariki ifite gahunda yo kongera amafaranga ava mu bukerarugendo akaba yageze kuri miliyoni eshanu z’amadolari yinjira buri mwaka, bitarenze 2030, aho Zipline yonyine biteganyijwe ko izakurura abasura bagera ku 9,000.
