Ukuriye MRDP-Twirwaneho, Freddy Kaniki, yatangaje abasirikare bashya bahawe amapeti yo hejuru, mu rwego rwo gushyira mu bikorwa politiki y’ivugurura mu gisirikare cyayo bise FRP-Twirwaneho (Forces Républicaines Populaires).
Ni ibikubiye mu itangazo ryakozwe hagati mu Kwakira, rishyirwa hanze ku mugoroba wo ku wa Gatatu tariki ya 5 Ugushyingo 2025, rishingiye ku ngingo ya 21 y’amategeko shingiro ya MRDP-Twirwaneho.
Abasirikare bahawe ipeti rya Colonel ni icyenda, barimo; Gakunzi Masabo John, Gikwerere Makombe Charles, Mufoko Rukwe Joli, Munyamahoro Mudeke Jaques, Ndakize Kamasa Welcome, Ndori Bestfriend Thomas, Nyamibwa Masasa Isaac, Rushambarirwa Bigirimana Moise na Singaye Ntebutsi Prosper.
Abandi basirikare 27 bahawe ipeti rya Lit Col barimo; Bizimana Shamaragwe Azarias, Gikire Ntwari Eduard, Kabarira Nyamashashi Bernard Nsenga Eric n’abandi. Ni mu gihe abahawe ipeti rya Majoro ari 61.
Umutwe wa Twirwaneho, umaze imyaka irenga umunani urwana n’indi mitwe irimo Mai-Mai n’ingabo za Leta (FARDC) zifashwa n’iz’u Burundi, mu bice bya Kivu y’Amajyepfo.
Uyu mutwe uvuga ko urwana ku baturage b’Abanyamulenge biganjemo abatuye mu bice bya Mulenge, bavuga ko barwanira uburenganzira bwabo n’umutekano bambuwe n’Abanye-Congo.
