Ubuyobozi bwa Pariki y’Igihugu y’Akagera bwatangaje ko mu 2025 ibikorwa by’ubucuruzi biterwa inkunga n’iyi pariki byinjije agera kuri 555,242$ asaga miliyoni 800 Frw asaranganywa abagera ku 1200 bibumbiye mu makoperative atandukanye ayituriye.
Muri izi Koperative zitandukanye abibumbiye mu y’ubworozi bw’inzuki bwatanze toni zisaga 17 bufite agaciro k’asaga miliyoni 100Frw, mu gihe Koperative z’uburobyi zo zinjije asaga miliyoni 170 Frw.
Ni mu gihe kandi ku rundi ruhande hari amafaranga asaga miliyoni 900 Frw yaturutse mu bikorwa by’ubukerarugendo n’ubucuruzi bwakozwe na Pariki y’Akagera.
Binyuze muri gahunda y’Igihugu yo gusaranganya inyungu yaturutse mu bukerarugendo hari amafaranga agera kuri $886,379 . yateganyijwe muri uyu mwaka wa 2025/2026 aho azakoreshwa mu mishinga mishya y’abaturage izamurikwa muri uyu mwaka wa 2026.
Mu mwaka wa 2025/2026 urwunguko rw’amafaranga yavuye mu bukerarugendo yari ateganganyijwe ko azasaranganywa abaturiye iyi Pariki babarizwa mu turere dutatu Kayonza, Nyagatare na Rwamagana ni miliyari 1.285 Frw.
Imibare iherutse gusohoka igaragaza ko Pariki y’Akagera mu 2025 , umubare w’abayisuye mu 2025 wiyongereye, ugera ku bantu 59.538, ibyatumye yinjiza miliyoni 5,06 $.
Imibare yashyizwe hanze n’ikigo African Parks gicunga iyi pariki igaragaza ko mu bantu 59.538 bayisuye, abagera kuri 51.769 bishyuye, bangana n’izamuka rya 8%, ugereranyije n’umwaka wa 2024.
Muri aba, Abanyarwanda bari 47%, abanyamahanga ari 47%, naho abanyamahanga batuye mu Rwanda ari 6%.
Abasura iyi pariki nabo biyongereyeho 8%, aho bageze ku bihumbi birenga 59. Muri aba basura iyi pariki harimo abishyura bagera ku bihumbi 51 barimo ab’imbere mu Gihugu, abo mu Karere n’abaturutse mu bihugu by’amahanga.
