Ubushakashatsi ku buzima n’imibereho y’abaturage mu Rwanda (RDHS) bwa 2025 bugaragaza ko umubare w’impfu z’abana bari munsi y’imyaka itanu ugenda ugabanuka aho mu myaka 25 ishize zagabanutse ku rugero rungana na 81.6%.
Ibi byatangajwe n’Ikigo cy’Igihugu cy’Ibarurishamibare (NISR) ku bufatanye na Minisiteri y’Ubuzima bwashyizwe muri raporo yagiye hanze ku wa 30 Kamena 2026.
Raporo ya NISR igaragaza ko mu myaka 20 ishize u Rwanda rwateye intambwe ishimishije mu kugabanya impfu z’abana bari munsi y’imyaka itanu aho mu 2000, mu bana 1.000 bavukaga ari bazima, 196 bapfaga batarageza ku myaka itanu mu 2005 baramanuka nagera ku bana 152 mu 2005, mu gihe mu 2010 bamanutse bakagera kuri 76.
Mu 2014-2015 wakomeje kugabanuka ugera ku bana 50 ndetse kigera ku bana 45 mu 2019–2020. Mu 2025, iki gipimo cyongeye kugabanuka kigera ku bana 36 ku bana 1.000 bavuka batarageza ku myaka itanu.
Ku rundi ruhande raporo igaragaza ko urugendo rutararangira, kuko kugeza ubu abana 36 muri buri 1.000 bavuka ari bazima bagipfa batarageza ku myaka itanu, ibintu bigaragaza ko hakiri ingamba zikenewe mu gukomeza guteza imbere ubuzima bw’umubyeyi n’umwana.
Ubushakashatsi bugaragaza ko ababyarira kwa muganga bakomeje kwiyongera ku buryo bugaragara, aho bavuye kuri 25% mu 1992 bagera kuri 98% mu 2025.
Mu 1992, abagore bane muri batanu babyariraga mu rugo cyangwa ahandi hatari mu mavuriro. Mu 2025, hafi abagore bose babyariye kwa muganga, ibintu byagize uruhare rukomeye mu kugabanya impfu z’ababyeyi n’iz’abana bapfa bavuka.
Mu 2000, ijanisha ry’ababyariraga kwa muganga ryari kuri 27%, rikomeza kuzamuka rigera kuri 39% mu 2005, 69% mu 2010, 91% mu 2014–2015, 94% mu 2019–2020, ndetse rigera kuri 98% mu 2025.
Bivuze ko abagore batabyarira kwa muganga mu Rwanda basigaye ari 2% gusa, bikagaragaza intambwe Igihugu kimaze gutera mu kugabanya impfu z’abana n’ababyeyi.
