Ikigo cy’Igihugu cy’Iterambere (RDB), ku bufatanye na African Parks, cyamuritse ku mugaragaro ibikorwa bishya byitezweho guteza imbere ubukerarugendo muri Pariki y’Igihugu ya Nyungwe.
Ibi bikorwa byatangijwe ku mugaragaro kuri uyu wa Gatatu, tariki ya 2 Nyakanga 2025, birimo Munazi Eco-Lodge, Nyungwe Zipline, ndetse na Gisakura Rope Course.
Ibirori byo kumurika ibi bikorwa byitabiriwe n’Umuyobozi Mukuru wa RDB, Jean Afrika, hamwe n’abandi bayobozi bakuru mu nzego z’ubukerarugendo no kurengera ibidukikije.
Munazi Eco-Lodge ni amacumbi mashya yubatswe mu ishyamba rya Nyungwe, mu buryo burengera ibidukikije. Afite ibyumba 9 byakira abashyitsi, harimo n’icyumba cya VIP kirimo jacuzzi, harimo n’ibindi by’ingenzi nka Wi-Fi, amazi ashyushye, n’ibindi byorohereza abahasuye.
Iyi lodge yatangiye kwakira ba mukerarugendo muri Gicurasi 2025, ikaba ikoresha abakozi bo mu gace ka Nyungwe, bigafasha mu guteza imbere imibereho y’abaturage baho.
Nyungwe Zipline ni umugozi muremure cyane wa zipline wubatswe muri Nyungwe, ufite uburebure bwa metero 1,935, ukaba umwe mu miremire mu karere. Ugizwe n’uduce dutatu: agace ka 350 m, 500 m, na 1,000 m.
Abahasura babasha kugendera kuri uyu mugozi hejuru y’ishyamba, ku butumburuke buri hagati ya metero 20 na 50, bakishimira uburanga bwaryo. Ubuyobozi bwa pariki buvuga ko iyi zipline izafasha mu kongera ba mukerarugendo, aho biteganyijwe ko izakira abantu 3,500 mu mwaka wa mbere, bikazagera kuri 9,000 mu myaka itanu iri imbere.
Gisakura rope course nayo ni uburyo bwo kwidagadura by’umwihariko bigenewe abana, byubatswe hafi ya Gisakura Guesthouse. Abakoresha iyi rope course bishyura amafaranga 10,000 Frw ku Banyarwanda, 20 USD ku baturutse mu bihugu bya Afurika, na 35 USD ku baturutse mu bindi bihugu byo hanze.
Ibi bikorwa byose bigamije guteza imbere ubukerarugendo burambye, bufasha mu kubungabunga ibidukikije no kuzamura imibereho y’abaturage batuye hafi y’ishyamba rya Nyungwe. African Parks, ifatanya na Leta y’u Rwanda gucunga Nyungwe, yashimangiye ko ibi bikorwa bishya bizatuma pariki irushaho kwamamara ku rwego mpuzamahanga no kwinjiza amafaranga yifashishwa mu kuyicunga neza.
Pariki y’Igihugu ya Nyungwe ni kimwe mu mashyamba ya kimeza akomeye muri Afurika, icumbikira amoko menshi y’inyoni, inyamaswa n’ibimera bidakunze kuboneka ahandi, ikaba igira uruhare rukomeye mu kurinda urusobe rw’ibinyabuzima.
