Minisiteri y’Uburezi, ibinyujije mu kigo gishinzwe ibizamini n’ubugenzuzi bw’amashuri (NESA), yatangaje gahunda y’uko abanyeshuri biga bacumbikirwa bazatangira gusubira ku mashuri mu gutangira igihembwe cya gatatu cy’umwaka w’amashuri wa 2025/2026.
Gusubira ku ishuri bizatangira kuva tariki ya 17/04/2026 kugera ku ya 20/04/2026. Iyi gahunda yashyizweho hakurikijwe uturere n’intara kugira ngo ingendo zikorwe mu buryo bukwiye, butabangamiye umutekano w’abanyeshuri kandi zikorwe mu gihe gikwiye.
Mu itangazo ryashyizwe hanze na NESA dore gahunda y’ingendo z’itangira ry’abanyeshuri igihembwe cya 3 izagenda:
Ku wa 17/04/2026 (Ku wa Gatanu): Abanyeshuri bo mu turere twa:Ruhango, Gisagara,Ngororero Nyagatare, Gatsibo, Musanze.
Ku wa 18/04/2026 (Ku wa Gatandatu): Abanyeshuri bo mu turere twa; Huye, Nyamagabe, Nyabihu , Rubavu, Burera.
Ku wa 19/04/2026 (Ku Cyumweru): Abanyeshuri ba:Nyanza, Kamonyi, Karongi, Rutsiro, Rulindo, Gakenke, Ngoma, Kirehe.
Ku wa 20/04/2026 (Ku wa Mbere): Abanyeshuri bo mu turere twa;Muhanga, Nyaruguru, Rusizi, Nyamasheke, Bugesera, Gicumbi, Nyarugenge, Gasabo, Kicukiro.
Abanyeshuri bose bazajya mu mashuri yabo mu buryo bw’umutekano, kandi ababyeyi basabwa kubahiriza neza iyi gahunda no kohereza abana hakiri kare kugira ngo bashyike ku ishuri mbere y’uko igihembwe gitangira ku wa 20 Mata 2026.
Ababyeyi basabwa gukora ibishoboka byose kugira ngo abana bagere ku ishuri mu gihe kigenwe. Abanyeshuri bose kandi barasabwa kugenda bambaye umwambaro w’ishuri.
Abanyeshuri bahaguruka i Kigali bazajya mu “Kigali Pele Stadium” kugira ngo bahafatire imodoka zibajyana mu ntara zitandukanye.Nyuma ya saa cyenda (15h00) Sitade izajya iba ifunze. Iyi gahunda yashyizweho kugira ngo abanyeshuri biga bacumbikirwa basubire ku mashuri mu mutuzo no mu mutekano. NESA yasabye ababyeyi, abayobozi b’amashuri n’abanyeshuri bose gukomeza gufatanya kugira ngo iyi gahunda igerweho neza.
