Imyaka 22 irashize abatuye mu Karere ka Muhanga bagitegereje iyubakwa rya hoteli y’inyenyeri enye ihuriweho n’Uturere twa Kamonyi na Ruhango ariko na n’ubu nta kanunu k’igiye izubakirwa.
Umushinga wo kubaka iyi hoteli watekerejweho mu 2003 ndetse nyuma byanzurwa ko ugomba kujyanishwa n’iyubakwa rya Stade Mpuzamahanga mu Murenge wa Shyogwe.
Ahazashyirwa ibi bikorwaremezo abari bahatuye bamaze kwimurwa ariko hari abagihari bakiri mu rujijo.
Umwe mu baturage yabwiye RBA ati “Nta muntu baha uburenganzira bwo kubaka inzu. Turi aha tutazi aho tuzajya twebwe abasigayemo. Abagiye mbere bo bagiye bagura ibibanza ahandi bakubaka.’’
Muri metero 300 hafi y’ahazubakwa Stade Mpuzamahanga, hari hegitari zisaga 17 z’ubutaka zigomba kubakwaho hoteli y’inyenyeri enye ihuriweho n’Uturere twa Ruhango, Muhanga na Kamonyi.
Mu mwaka wa 2003 ni bwo igitekerezo cyo kuyubaka cyatanzwe n’Umukuru w’Igihugu ndetse icyo gihe yahise anawutera inkunga.
Abaturage bagaragaza ko batazi impamvu hashize imyaka isaga 20 nta n’ikimenyetso kirashyirwa ahazubakwa uwo mushinga cyangwa niba warapfubye.
Umwe muri bo yagize ati “Baraje bimura abaturage bari bahatuye none twarabitegereje turabibura.’’
Tariki 25 Nzeri muri 2022, ikibazo cy’uyu mushinga cyakomojweho na Perezida Kagame mu biganiro yagiranye n’abavuga rikumvikana bo mu Ntara y’Amajyepfo.
Icyo gihe yabajije aho uwo mushinga ugeze, anongera kwizeza ko inkunga ye igihari.
Ukuriye uyu mushinga, Twagirumutara Khalifan, yavuze ko umushinga wadindijwe n’uko sosiyete yo muri Turukiya yatsindiye isoko ryo kubaka hotel yabatengushye.
Yakomeje ati “Dufashijwe na RDB twerekanye ko icyo kintu kikiri ku isoko twitabwa na sosiyete 13, zirimo eshatu zo mu gihugu hagati. Izo hanze zerekanye ibikorwa bifatika, zakoze n’ahandi, twatoranyijwemo zirindwi zizavamo imwe izakora iki gikorwa.’’
Abaturage biteze ko ibi bikorwaremezo biteganyijwe muri uyu mushinga bizabateza imbere binyuze mu kwegerezwa imihanda myiza, kubona akazi no kwakira ba mukerarugendo bazajya babagana baje kubisura.
Imbanzirizamushinga yayo yerekana ko yagombaga kubakwa mu Murenge wa Nyamabuye mu mpinga y’agasozi ka Binunga ariko mu 2019 hanzuwe ko wimurirwa mu Murenge wa Shyogwe mu Kagari ka Mubuga.
Biteganyijwe ko iyi hoteli y’inyenyeri enye izubakwa i Muhanga izuzura itwaye miliyari zisaga 30 Frw.
