Perezida Kagame yageze i Abu Dhabi muri Leta Zunze Ubumwe z’Abarabu, UAE, aho yitabiriye Inama Mpuzamahanga ya Abu Dhabi Sustainability Week.
Kuri uyu wa Mbere, tariki ya 13 Mutarama 2025, ni bwo Umukuru w’Igihugu yasesekaye i Abu Dhabi.
Ku Kibuga cy’Indege cyo muri UAE, Perezida Kagame yakiriwe na Minisitiri w’Ububanyi n’Amahanga w’iki gihugu, Sheikh Shakhboot Nahyan Al Nahyan.
Inama Mpuzamahanga yiga ku bikorwa by’iterambere rirambye izwi nka Abu Dhabi Sustainability Week (ADSW). Ni umwanya wo gusangizanya ubumenyi, kuganira ku ishyirwa mu bikorwa rya za gahunda zitandukanye no gutanga ibisubizo bigamije iterambere ry’ikiremwamuntu.
Biteganyijwe ko mu gitondo cyo ku wa Kabiri, Perezida Kagame azifatanya na Perezida wa UAE, Sheikh Mohamed bin Zayed Al Nahyan, abakuru b’ibihugu na za Guverinoma n’abandi banyacyubahiro mu gutangiza ku mugaragaro Abu Dhabi Sustainability Week.
Perezida Kagame kandi ari no mu bakuru b’ibihugu bazitabira ibirori by’itangwa ry’ibihembo bizwi nka Zayed Sustainability Prize.
Ibi bihembo bihabwa abantu n’ibigo bito n’ibiciriritse, imiryango itegamiye kuri Leta n’ibigo by’amashuri byahanze ibisubizo bikemura ibibazo bitandukanye muri sosiyete.
Ibi bihembo byatangiye gutangwa mu 2008, byitiriwe nyakwigendera Sheikh Zayed bin Sultan Al Nahyan ufatwa nk’intwari muri UAE, ndetse Isi imufata nk’uwanaharaniye kwimakaza ubumuntu.
Perezida Kagame uzasoza uruzinduko rw’akazi ari kugirira muri UAE biteganyijwe ko azavuga ijambo mu nama izahuza abakuru b’ibihugu ku munsi wa mbere wa ADSW.
Iyi nama yateguwe ku nsanganyamatsiko iganisha ku gukoresha ikoranabuhanga rigezweho mu kubaka ahazaza hizewe kandi hadaheza.
ADSW ihuza abayobozi mu nzego nkuru ku Isi, abashoramari n’abahagarariye sosiyete sivile, abashinzwe ibikorwa by’igenamigambi, abahanga mu by’inganda no mu ikoranabuhanga. Itegurwa hagamijwe gushaka ibisubizo by’ibibazo Isi ifite, guteza imbere ikoreshwa ry’ingufu zitangiza ikirere no kwihutisha ibikorwa by’iterambere rirambye.
