Perezida Kagame na Madamu Jeannette Kagame bari mu mujyi wa Ankara muri Turukiya mu ruzinduko rw’iminsi ibiri.
Ni ubutumwa bwasangijwe n’ibiro by’umukuru w’Igihugu ku rubuga rwa X, ku mugoroba wo ku wa gatatu, tariki 22 Mutarama 2025.
Ubutumwa busobanura ko, ku munsi wo ku wa kane, Perezida Kagame azagirana ibiganiro byihariye na mugenzi we, Recep Tayyip Erdogan, bizakurikirwa n’ibizitabirwa n’abandi bayobozi mbere yo guhura n’abanyamakuru.
Kuri uwo munsi Perezida Kagame na Madamu Jeannette Kagame bazasura Urwibutso rwa Anıtkabir, ahashyinguye Mustafa Kemal Atatürk, wabaye Perezida wa mbere wa Turukiya nyuma yuko ibonye ubwigenge.
Ku mugoroba Perezida Kagame na Madamu Jeannette Kagame bazakirwa ku meza na Perezida Recep Tayyip Erdoğan.
U Rwanda na Turukiya ni ibihugu bisanzwe bifitanye umubano ushingiye ku bufatanye mu nzego zirimo guteza imbere ubumenyi n’ikoranabuhanga,ubucuruzi n’ishoramari,umuco no guhanga udushya.
Uyu mubano washinze imuzi ubwo Turukiya ifungura Ambasade mu Rwanda mu 2014, nyuma y’u mwaka umwe u Rwanda ruyifunguye mu mujyi wa Ankara muri Turukiya.
Umubano wongera gushingira ku masezerano anyuranye ibihugu bigenda bishyiraho umukono, arimo ayo kurushaho gukaza umutekano, imikoranire hagati y’Inteko zishinga amategeko n’ibindi.
