Perezida Kagame yahuye na mugenzi we wa Kazakhstan, Kassym-Jomart Tokayev, bagirana ibiganiro byibanze ku guteza imbere imikoranire mu by’ubukungu, hagamijwe kuzamura imibereho myiza y’ibihugu byombi.
Kuri uyu wa kabiri nibwo Perezida Kagame yageze i Baku muri Azerbaijan, aho yitabiriye Inama ya 29 y’Umuryango w’Abibumbye yiga ku mihindagurikire y’ibihe (COP29).
Inama ya COP29 yatangiye kuwa mbere tariki ya 11 Ugushyingo 2024, ikaba yahuje abayobozi batandukanye aho bari bube biga ku buryo bwo kwihutisha ingamba zo guhangana n’imihindagurikire y’ikirere.
Ibiro bya Perezida Kagame byatangaje ko yahuye na Perezida wa Kazakhstan, Kassym-Jomart Tokayev baganira ku guteza imbere imikoranire mu by’ubukungu, hagamijwe kuzamura imibereho myiza y’abaturage b’Ibihugu byombi.
Umubano w’u Rwanda na Kazakhstan washinze imizi ubwo rwagenaga umuntu ugomba kuruhagararira muri icyo gihugu muri 2016.
Minisitiri w’Ububanyi n’Amahanga w’u Rwanda, Olivier Nduhungirehe, aherutse gusinya amasezerano na mugenzi we wa Kazakhstan, Murat Nurtleu, yo gukuraho Visa ku baturage b’ibihugu byombi mu koroshya urujya n’uruza.
Ni amasezerano yasinyijwe i New York muri Leta Zunze Ubumwe za Amerika aho aba bayobozi bitabiriye inama y’Inteko Rusange ya Loni iri kuba ku nshuro ya 79.
Kazakhstan, n’igihugu kinini kidakora ku nyanja giherereye ahanini muri Aziya yo Hagati, kikagira n’agace gato mu Burayi bw’Iburasirazuba.
Gihana imbibi n’ibihugu birimo u Burusiya, u Bushinwa, Kyrgyzstan, Uzbekistan, na Turkmenistan ndetse gifite inkombe ku nyanja ya Caspienne.
Umurwa mukuru wa Kazakhstan ni Astana, mu gihe Umujyi munini wa Almaty, ari wo ukorerwamo ubucuruzi n’umuco. Kikaba gikomeye muri Aziya yo Hagati mu by’ubukungu n’ubushobozi bwa politiki.
