Perezida Kagame yagaragaje ko u Rwanda rumaze kwimakaza ikoranabuhanga mu nzego zitandukanye ndetse serivisi nyinshi zitangwa ryifashishijwe.
Umukuru w’Igihugu yabikomojeho kuri uyu wa Kabiri, tariki ya 14 Mutarama 2025, mu ijambo yavugiye mu nama yiga ku Iterambere rirambye, ‘Abu Dhabi Sustainability Week’, iri kubera i Abu Dhabi.
Perezida Kagame yavuze ko gahunda z’iterambere rirambye zisa n’izitaragera ku musaruro ukwiye by’umwihariko ku Mugabane wa Afurika.
Yavuze ko “Politiki zemeranyijweho ntizishyirwa mu bikorwa mu gihe hahoraho ibiganiro by’ibigomba gukorwa.’’
Yavuze ko hakenewe ikoranabuhanga rihamye mu rugendo rwo guhangana n’ingaruka zangiza ikirere.
Perezida Kagame yagaragaje ko u Rwanda rwatekereje ku gushyiraho uburyo butuma abarushoramo imari boroherwa n’ubuzima.
Ati “Twamuritse Ikigega gitera inkunga ibikorwa byo guhanga udushya, Rwanda Innovation Fund, RIF, cyo gushyigikira ibigo bikora udushya no kwiyegereza ishoramari ry’abanyamahanga.’’
Umukuru w’Igihugu yavuze ko hari ikoranabuhanga rifasha abahinzi kubona amakuru abafasha gufata ibyemezo bikwiye ndetse na serivisi zo kwa muganga zitangwa muri urwo ruhererekane.
Ati “Zipline, ikigo gikoresha drones cyatangiye mu Rwanda gikwirakwiza ibikoresho byo kwa muganga, ubu kibarirwa agaciro ka miliyari mu bikorwa gikorera ku migabane itandukanye.’’
Perezida Kagame yavuze ko mu bijyanye no gukoresha ingufu zitangiza ikirere, hakozwe ishoramari rihamye.
Yakomeje ati “Twashoye imari mu binyabiziga bikoresha amashanyarazi ndetse no kwishyurana hifashishijwe ikoranabuhanga mu ngendo rusange.’’
Yanavuze ko imodoka zikoresha amashanyarazi zagabanyirijwe imisoro mu rugendo rwo gukomeza kwimakaza ikoreshwa ry’ingufu.
Perezida Kagame yanagaragaje ko gukoresha ingufu za nikeleyeri byafasha Isi bishingiye ku kuba zitanga ingufu z’amashanyarazi yizewe.
Perezida Kagame yageze i Abu Dhabi muri Leta Zunze Ubumwe z’Abarabu, UAE, ku wa Mbere, tariki ya 13 Mutarama 2025, aho yitabiriye Inama Mpuzamahanga ya Abu Dhabi Sustainability Week, yiga ku bikorwa by’iterambere rirambye.
Iyi nama ifatwa nk’umwanya wo gusangizanya ubumenyi, kuganira ku ishyirwa mu bikorwa rya za gahunda zitandukanye no gutanga ibisubizo bigamije iterambere ry’ikiremwamuntu.
