Perezida wa Repubulika y’u Rwanda, Paul Kagame, yashimiye Ikipe ya Paris Saint-Germain, yamamaza ubukerarugendo bw’u Rwanda binyuze muri Visit Rwanda, yandagaje Inter Milan iyinyagiye ibitego 5-0, igatwara UEFA Champions League.
Mu ijoro ryo kuri uyu wa Gatandatu, tariki ya 31 Gicurasi 2025, ni bwo habaye umukino wa nyuma uhuza amakipe yabaye aya mbere ku Mugabane w’u Burayi (UEFA Champions League) wahuje Paris Saint-Germain yo mu Bufaransa na Inter Milan yo mu Butaliyani.
Uyu mukino wabereye mu Budage ku kibuga cya Bayern Munich, Allianz Arena, warangiye Paris Saint-Germain yamamaza Visit Rwanda iwutsinze ibitego 5-0.
Ni ibitego byinjijwe na Ashraf Hakim ku munota wa 12, Désiré Doué ku munota wa 20 n’uwa 63, Khvicha Kvaratskhelia ku munota wa 73 ndetse na Senny Mayulu ku munota wa 86.
Perezida Kagame abinyujije kuri X [Twitter] ye yashimiye PSG, yegukanye intsinzi n’igikombe cya Champions League ku nshuro ya mbere.
Yagize ati “Mwishyukwe PSG, mbega umukino wari ushimishije kureba, muteye ishema abafana n’abafatanyabikorwa.”
PSG yashinzwe mu 1970, ni cyo gikombe cya mbere cya UEFA Champions League yegukanye mu mateka yayo kuva yashingwa. Iyi kipe itozwa n’Umunya-Espagne Luis Enrique yabigezeho itsinze amakipe arimo Manchester City, Liverpool, Aston Villa na Arsenal yo mu Bwongereza.
Yabaye ikipe ya kabiri yegukanye yo mu Bufaransa yegukanye Champions League nyuma ya Marseille yabigezeho mu 1993.
Intsinzi ya PSG kuri Inter Milan yanayigize iya mbere itsinze ibitego byinshi ku mukino wa nyuma [PSG 5-0 Inter Milan]. Andi makipe yatsinze ibitego byinshi harimo Real Madrid 7-3 Eintracht Frankfurt [1960], Bayern Munich 4-0 Atletico Madrid [1974], AC Milan 4-0 Steaua Bucharest [1989] na AC Milan 4-0 Barcelona [1994].
