Perezida wa Repubulika y’u Rwanda, Paul Kagame, yayoboye inama y’abaminisitiri, kuri uyu wa Gatanu, tariki ya 17 Mutarama 2025.
Iyi nama yatareniye muri Village Urugwiro, ni yo ya mbere Umukuru w’Igihugu ayoboye kuva umwaka wa 2025 watangira.
Ibiro by’Umukuru w’Igihugu, Village Urugwiro, ntibyatangaje ibikubiye mu ngingo nkuru zaganiriweho muri iyi nama.
Iyi nama yateranye mu gihe u Rwanda ruheruka gutangaza ko rwatsinze burundu Icyorezo cya Marburg ndetse rwanatangaje ko rwubatse ubushobozi butuma rushobora gutahura icyorezo cyose rwahura na cyo bitarenze amasaha 24.
Inama y’Abaminisitiri yaherukaga guterana ku wa 9 Ugushyingo 2024. Icyo gihe yemerejwemo umushinga w’itegeko rihindura itegeko rigenga Urwego rushinzwe Ubutasi ku Mari n’iryerekeye gukumira no guhana iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi.
Iyi nama ni na yo yemerejwemo iteka rya Perezida rigena ingano y’imisanzu itangwa mu bwiteganyirize bwa pansiyo butegetswe.
Kuva muri Mutarama 2025, umusanzu w’ubwiteganyirize uzagera kuri 12% ariko ukazakomeza kwiyongera ku buryo uzagera kuri 20% uhereye mu 2027 kugeza mu 2030. Muri icyo gihe, ni ukuvuga hagati ya 2027 na 2030, hazajya hiyongeraho 2%.
Ubusanzwe umusanzu w’ubwiteganyirize wari usanzwe uri kuri 6%, aho umukozi yatangaga 3%, umukoresha na we agatanga 3%.
