Radio Salus ya Kaminuza y’u Rwanda yegukanye ibihembo bitanu, mu bihembo ngarukamwaka bihabwa abanyamakuru mu Rwanda bakoze inkuru nziza zifitiye abaturage akamaro.
Iki gikorwa cyo guhemba abanyamakuru bahize abandi mu Rwanda, cyabaye kuri uyu wa Kane tariki ya 7 Ukwakira 2024, gitegurwa n’Ihuriro ry’Abanyamakuru mu Rwanda (ARJ) ku bufatanye n’Urwego rw’Igihugu rw’Imiyoborere (RGB), hagamijwe gushimira abanyamakuru bitwaye neza mu gutegura inkuru nziza mu byiciro bitandukanye.
Ibihembo Radio Salus yatsindiye birimo icy’inkuru ivuga ku ihohoterwa rishingiye ku gitsina n’irikorerwa abana; isuku n’isukura, ubucuruzi; gukumira inda ziterwa abangavu; n’ivuga ku buringanire n’ubwuzuzanye hagati y’umugabo n’umugore.
Abanyamakuru ba Radio Salus bahembwe ni Venuste Habineza wakoze inkuru yigisha abaturage kugira isuku n’isukura birinda indwara; Marie Jeanne Umutoni wakoze iyerekana ikibazo cy’abagore bahohoterwa bazizwa ko babyaye igitsina kimwe; Kazungire Merci Dieu wakoze ku kugabanya imisoro ku bicuruzwa byo mu Rwanda; Patrick Rurangangabo wakoze ku ngamba zo gukumira inda ziterwa abangavu; ndetse na Alice Tembasi wakoze inkuru ku buringanire n’ubwuzuzanye hagati y’abagabo n’abagore.
Mu gikorwa cyo gutanga ibyo bihembo, Radio Salus yakomewe amashyi na benshi mu bacyitabiriye biganjemo abanyamakuru yatoje ubunyamwuga, bigaragaza ko bishimiye ko ikomeje kuba indashyikirwa.
Umwanditsi Mukuru wa Radio Salus, Prudence Kwizera yavuze ko bishimye kandi ibihembo bahawe bibongereye imbaraga n’umurava byo gukomeza kuba radio irera abanyamwuga kandi ikita no kubatoza gukora inkuru zifitiye akamaro abaturage.
Yagize ati “Ibihembo twahawe turabyishimiye kandi byatwongereye imbaraga n’umurava byo gukomeza gukora cyane twuzuza inshingano zacu zo gutoza abanyamakuru ubunyamwuga no gukora inkuru zifitiye akamaro abaturage.”
Guhembwa kwa Radio Salus kwishimiwe n’Umuyobozi Wungirije wa Kaminuza y’u Rwanda ushinzwe igenamigambi n’imiyoborere, Dr. Ndikumana Raymond.
Yanditse ku rubuga rwa X ati “Mwakoze Radio Salus, umuryango wose wa Kaminuza y’u Rwanda wishimiye umuhate wanyu n’ubushobozi mwagaragaje. Mukomereze aho!”
Radio Salus ya Kaminuza y’u Rwanda isanzwe yita cyane ku gutoza ubunyamwuga abanyeshuri biga mu ishuri ry’Itangazamakuru n’Itumanaho no gukora inkuru zifitiye akamaro abaturage.
Mu bitangazamakuru byo mu Rwanda haba higanjemo abarezwe na Radio Salus kuko yashinzwe mu 2005 ihita itangira inshingano zayo.
Uretse Radio Salus, hari n’abandi banyamakuru bo mu bindi bitangazamakuru bahawe ibihembo muri uyu mwaka, birimo aba Radio Ishingiro, RBA, Radio TV10, IGIHE, The New Times, Radio TV1, n’abandi.
Umunyamakuru w’umwaka yabaye Oswald Mutuyeyezu ‘Oswakim’ ukorera Radio TV10, na we akaba yararerewe kuri Radio Salus ubwo yari umunyeshuri mu ishuri ry’Itangazamakuru n’Itumanaho mu yari Kaminuza Nkuru y’u Rwanda.
