Rayon Sports yasezerewe muri CAF Confederation Cup nyuma yo gutsindwa na Singida Black Stars yo muri Tanzania ibitego 2-1 mu mukino wo kwishyura, isezererwa ku giteranyo cy’ibitego 3-1 mu mikino yombi, kuko ubanza yayitsindiye i Kigali 1-0.
Ni umukino wabereye i Dar Es Salaam kuri uyu wa Gatandatu tariki ya 27 Nzeri 2025, ubera kuri Chamazi Azam Complex Stadium saa kumi n’ebyiri z’umugoroba.
Ibitego byatsinzwe na Idriss Diomande na Anthony Trabi ku ruhande rwa Singida, mu gihe igitego rukumbi cya Rayon Sports cyatsinzwe na Tambwe Gloire.
Afhamia Lotfi yari yabanje mu kibuga abasore nka Pavelh Mu izamu, Emmanuel Nshimiyimana, Musore Prince Michel, Rushema Chris, Youssou Diagne, Niyonzima Olivier Seif, Ndayishimiye Richard, Bigirimana Abedi, Tambwe Gloire, Tonny Kitoga, na Habimana Yves.
Rayon Sports yari ifite umwenda w’igitego cyo hanze yatsinzwe iwayo, yari ifite akazi gakomeye ko kugombora.
Yatangiye ifungura amazamu ku munota wa 37, Gloire Ngingo Tambwe ku mupira yahawe na Bigirimana Abedi arko mbere yo kujya kuruhuka cyishyurwa na Idriss Diomande ku munota wa 43 ku mupira yahawe na Elvis Rupia, bajya kuruhuka Ari 1-1.
Imibare ya Rayon Sports yahise izamo ibihekane, gusa ikomeza gushaka ibisubizo ariko Singida ibabana ibamba, n’ubwo umuzamu Pavelh Dzilah nawe yayitanze ku kiranguzo Akora ikosa ryatanze igitego cya kabiri ku munota wa 57 gitsinzwe na Anthony Trabi.
Afhamia Lotfi yahise impinduka azana Aziz Bassanne n’ubwj nta byinshi yatanze, igitutu cya Singida cyakomeje kuba cyinshi kuri Rayon, yarushwaga cyane bigaragara.
Umukino warangiye ari ibitego 2-1, igiteranyo (aggregate) kiba 3-1 kubera icyo yatsindiwe i Kigali, isezererwa ityo itarenze ijonjora ry’ibanze rya CAF Confederations Cup.
Ibinyujije ku rukuta rwa X, yihanganishije abakunzi bayo, inabashimira uburyo bayibaye hafi by’umwihariko abayiherekeje muri Tanzania.
Yagize iti “Tubikuye ku mutima, dushimiye byimazeyo abakunzi ba Rayon Sports bakoze urugendo rurerure bakaza kudushyigikira muri Tanzania .
“Nubwo tutabonye umusaruro twifuzaga, ishyaka n’urukundo rwanyu biraduha imbaraga zo guharanira kubashimisha mu mikino iri imbere”.
Rayon Sports igomba kugaruka i Kigali igategura Shampiyona, aho izakina umukino w’umunsi wa kabiri izakina na Police FCkuwa kane tariki ya 02 Ukwakira 2025 kuri Kigali Pele Stadium, ikurikizeho Gasogi United ku cyumweru tariki ya 05 Ukwakira.
