Perezida Kagame yashyize umucyo ku iyobyamvugo ry’abayobozi bakuru ba Afurika y’Epfo barimo na Perezida w’iki gihugu, Cyril Ramaphosa, bakomeje gukoresha mu itangazamakuru bagamije kuyobya uburari ku ntambara yo mu Burasirazuba bwa Congo.
Umukuru w’Igihugu yabigarutseho mu butumwa busubiza amagambo ya mugenzi we wa Afurika y’Epfo, Cyril Ramaphosa, yanyujije ku rukuta rwe rwa X [rwahoze ari Twitter].
Yagaragaje ko yatunguwe no kubona imvugo zikoreshwa n’abayobozi ba Afurika y’Epfo mu itangazamakuru zihabanye cyane n’ukuri, zuzuye ibinyoma ugereranyije n’ibyaganiriwe hagati y’abayobozi.
Mu butumwa bwa Perezida Kagame yasubije ku bwa Ramaphosa yagize ati “Muri iki cyumweru nagiranye ibiganiro bibiri na Perezida Cyril Ramaphosa ku biri kubera mu Burasirazuba bwa RDC, birimo n’iby’uyu munsi kare. Ibyavuzwe kuri ibi biganiro n’ibitangazamakuru byo muri Afurika y’Epfo na Perezida Ramaphosa ubwe, huzuyemo kugoreka amakuru, kwibasira ndetse n’ibinyoma.”
Yakomeje agaragaza ko niba ibiganiro byihariye bigera mu itangazo rigenewe Rubanda bigahindurwa, byaba bigaragaza uburyo ibibazo biri gufatwa.
Perezida Kagame yakebuye mugenzi we wa Afurika y’Epfo kuri amwe mu makuru agoretse yatangaje.
Mu butumwa Ramaphosa yanditse mbere asobanurira abaturage ba Afurika y’Epfo iby’urupfu rw’abasirikare baguye mu ntambara ihanganishije M23 n’Ingabo za RDC, FARDC, banashyigikiye, yagaragaje ko uyu Mutwe ufashwa n’abarwanyi b’u Rwanda.
Perezida Kagame mu kumusubiza yabanje kumwibutsa ko Ingabo z’u Rwanda ari igisirikare cyemewe.
Ati “Ingabo z’u Rwanda (Rwanda Defence Force) ni igisirikare gihamye ntabwo ari insoresore zitwaje inyeshyamba.”
Yakomeje ati “SAMIDRC [Ingabo za SADC zirimo n’iza Afurika y’Epfo zoherejwe muri RDC] ntabwo ari ingabo zishinzwe kubungabunga amahoro, ndetse nta n’umwanya zifite mu biri kuba, zashyizweho na SADC nk’ingabo zishyamiranya zigamije kugaba ibitero zifasha Guverinoma ya Congo kurwanya abantu ba yo, bakorana bya hafi n’imitwe yakoze Jenoside nka FDLR yibasira u Rwanda, ari na ko ikangisha kujyana intambara mu Rwanda ubwayo.”
Yongeyeho ati “SAMIDRC yimuye ingabo za nyazo zishinzwe kugarura amahoro, ingabo z’Umuryango wa Afurika y’Iburasirazuba, ndetse ibyo byagize uruhare mu kunanirana kwa gahunda y’imishyikirano.”
Perezida Kagame yanyomoje Perezida Ramaphosa, amwibutsa ko muburo yigeze atanga uwo ari wo wose, keretse niba waratangajwe mu rurimi rwe kavukire “ntumva”.
Ati “Yasabye inkunga kugira ngo Ingabo za Afurika y’Epfo zigire amashanyarazi ahagije, ibiribwa n’amazi, ibyo tuzafasha mu kubatumikira. Perezida Ramaphosa yanyemereye ko M23 itigeze yica abasirikare ba Afurika y’Epfo, FARDC ni yo yabishe.”
Perezida Kagame yasoje agaragaza ko niba Afurika yepfo ishaka gutanga umusanzu mu gutanga igisubizo cy’amahoro, byaba byiza, ariko itazahabwa umwanya wo kuba umuhuza.
Yanagaragaje ko mu gihe cyose Afurika y’Epfo yahitamo guhangana, u Rwanda narwo ruzakemura icyo kibazo muri ubwo buryo.
Ingabo za RDC zimaze iminsi mu mirwano n’inyeshyamba za M23 muri Kivu y’Amajyaruguru, ndetse kuri uyu Mutwe ni wo ugenzura Umujyi wa Goma.
M23 ikimara gufata Goma yasabye Ingabo za FARDC n’imitwe zari zifatanyije na yo kuyirwanya irimo Wazalendo, FDLR, abacanshuro, Ingabo z’Abarundi n’iza SAMIDRC zirimo n’iza Afurika y’Epfo kwishyikiriza Monusco no kumanika intwaro.
Kuva tariki ya 23 Mutarama 2025, abasirikare 13 bo muri Afurika y’Epfo bamaze kwicirwa ku rugamba rwo mu Burasirazuba bwa RDC.
