Paul Rusesabagina wahamijwe ibyaha by’iterabwoba akaza guhabwa imbabazi na Perezida wa Repubulika y’u Rwanda Paul Kagame, nyuma yo kwandika amabaruwa asaba imbabazi, yongeye kumvikana ku bitangazamakuru byo hanze y’u Rwanda avuga ibinyoma ku Rwanda n’Abanyarwanda.
Uyu mugabo w’imyaka 70 ubwo yari mu kiganiro gisoza umwaka wa 2024, kuri Shene ya Youtube yitwa ‘Ubumwe’, yatangaje ibinyoma bitandukanye birimo kuba yarazengurutse u Rwanda, nyamara igihe yarumazemo cyose yari afunze.
Yagize ati” Urwo Rwanda ndaruzi, nanjye baramfashe, baranshimuta, barunjyanamo ndetse naranarubonye. Nabonye za Rwanda ebyiri. U Rwanda ruri muri Kigali, nazengurutse Kigali hose, aho basenyera uwo bashatse wese, bakamutwikira.”
Nyamara Rusesabagina ubwo yageraga mu Rwanda yari afatiwe ku kibuga cy’Indege cya Kanombe muri Kanama 2020, afungirwa muri kasho y’URwego Rwubugenzacyaha, RIB, amaze gukatirwa imyaka 25 ajyanwa mu igororero rya Nyarugenge, aho yavuye amaze guhabwa imbabazi na Perezida Kagame, yurizwa indege agana Qatar ariho yavuye yerekeza muri Leta Zunze Ubumwe z’Amerika.
Rusesabagina yongeye kumvikana avuga ko Abanyarwanda bashonje by’umwihariko abatuye mu byaro bicwa n’inzara nyamara abatuye mu mujyi wa Kigali barya bakanasagura, ibi binyomozwa na Raporo y’Ubukungu bw’u Rwanda ya Banki y’Isi.
Iyi raporo igira iti” Ubukungu bw’u Rwanda bwakomeje kuzamuka cyane mu cyiciro cya mbere cy’umwaka wa 2024. Nyuma yo kuzamuka ku gipimo cya 8.2% mu mwaka wa 2022-2023, Umusaruro mbumbe (GDP) wazamutse ku gipimo cya 9.7% mu gice cya mbere cy’umwaka wa 2024.”
Rusesabagina yongeye kumvikana avuga ko ashishikajwe no kugarurira uburenganzira bwa muntu Umunyarwanda wese, nyamara mu byaha byatumye atabwa muri yombi mu 2020 ndetse agakatirwa harimo; iterabwoba, gutwika, ubushimusi n’ubwicanyi yakoreye abaturage b’Abanyarwanda b’inzirakarengane bo mu bice bya Nyabimata mu karere ka Nyaruguru, no muri Nyungwe mu karere ka Nyamagabe mu 2018.
Paul Rusesabagina yashinze umutwe w’iterabwoba wa FLN, wagiye ugaragara mu bikorwa byo guhungabanya umutekano w’u Rwanda mu bihe bitandukanye, kugeza ubwo atawe muri yombi we n’uwari Visi Perezida wawo, Nsabimana Callixte uzwi nka ‘Sankara’.
Rusesabagina yarekuwe ahawe imbabazi na Perezida Paul Kagame nyuma y’amabaruwa yagiye yandika agaraza kwicuza, yongera gusubira muri Leta Zunze Ubumwe za Amerika aho yari atuye. Kuva icyo gihe Rusesabagina ntahwema gukomeza kumvikana mu bitangazamakuru avuga ibinyoma ku Rwanda n’Abanyarwanda.
