Abanyamabanga nshingwabikorwa b’Utugari tw’Umurenge wa Kigabiro mu Karere ka Rwamagana bashyikirijwe ibikoresho by’akazi birimo mudasobwa biri mu bihembo uyu murenge wemerewe na Minisiteri y’Ubutegetsi bw’Igihugu, MINALOC.
Ni nyuma yo kugaragaza agashya wahanze, kiswe “Twite ku Mwitero Wacu”, bituma MINALOC ibagenera ibihembo by’ishimwe.
Ni ibihembo bashyikirijwe n’Umuyobozi w’Akarere Wungirije Richard Kagabo kuri uyu wa mbere tariki ya 16 Werurwe 2026.
Muri Gahunda ya “Twite ku Mwitero Wacu” y’uyu murenge wa Kigabiro, habaho ibiganiro biyobowe na Komite z’Imidugudu, abakorerabushake na Komite y’Umugoroba w’Ababyeyi,
Muri ibi biganiro ingo zifite ibibazo zigirwa inama, hakanakorwa ubukangurambaga. Kuva iyi gahunda yatangizwa, amakimbirane yaragabanutse n’abaturage bitabira gahunda za Leta.
