Sosiyeti y’ubwishingizi, BK Insurance yagobotse abahinzi n’aborozi bo mu karere ka Rwamagana bahuye n’igihombo mu gihembwe cy’ihinga cya 2024B, muri gahunda ya Leta y’ubwishingizi bw’ibihingwa n’amatungo yiswe ‘Tekana’.
Ku wa gatatu tariki ya 9 Ukwakira, abahinzi n’aborozi bo mu cyanya cya Cyaruhogo bafashe ubwishingizi muri BK Insurance, bishyuwe n’iyi sosiyeti arenga miliyoni 37 mu gikorwa cyitabiriwe n’umunyabanga wa leta muri Minisiteri y’Ubuhinzi, Eric Rwigamba.
Aba bahinzi bari bahuye n’igihombo mu gihembwe cya 2024B, bishyuwe 26,720,000Frw mu gihe aborozi bishyuwe 10,913,167Frw.
Umunyamabanga wa leta muri Minisiteri y’Ubuhinzi, Rwigamba yasabye abahinzi n’aborozi bo mu karere Ka Rwamagana kurushaho kwitabira gahunda yo kwishinganisha muri BK Insurance yiswe ‘Tekana’, kuko itanga umutekano mu bikorwa byabo ndetse ikaba irimo na nkunganire ya Leta ya 40%.
Ati “Kuba hari abamaze kwishingira ibihingwa n’amatungo bigaragaza urwego Abanyarwanda tugezeho mu guteganya ibidufitiye akamaro”
Yakomeje ashimira abamaze kumva gahunda ya ‘Tekana’, Ibigo by’ubwishigizi na Leta yashyizeho iyi gahunda yunganira abahinzi n’aborozi mu kwishingira umusaruro wabo.
Yasoje asaba ubufatanye muri iyi gahunda, Ati “Uru rugendo rwo guteza imbere ubuhinzi n’ubworozi tugomba kurugendanamo kandi ubufatanye ni bwo buzadufasha kugera ku iterambere twifuza.”
