Umubyinnyi mpuzamahanga Sherry Silver, washinze umuryango Sherry Silver Foundation, umunyarwenya Kansime Anne ukomoka muri Uganda, umuhanzikazi Tyla wo muri Afurika y’epfo n’umukinnyi wa filime mpuzamahanga Lupita Nyong’o ufite inkomoko muri Kenya, bagaragaye ku rutonde rw’abagore batanu bakomeje kugaragaza impinduka mu myidagaduro ya Afurika, kandi bakabera abandi icyitegererezo.
Uru rutonde rwakozwe n’urubuga Leading Ladies Africa rusanzwe rukora intonde zibanda cyane cyane ku bagore banyuranye bagaragaza impinduka muri Afurika, ariko kandi rukaba rufite mu nshingano kwita k’uburenganzira bw’abagore bo muri Afurika, harimo no kubafasha kugera ku ntego n’inzozi zabo.
Sherry Silver wagaragaye kuri uru rutonde yashinze umuryango wita kubana ubafasha gukuza impano zabo “Sherry Silver Foundation” ndetse akaba ari n’umubyinnyi kabuhariwe.
Uyu mukobwa w’imyaka 29 y’amavuko, yatangiye kuzamuka cyane mu mwaka wa 2018 nyuma yo kuyobora amashusho y’indirimbo “This is America” y’umuhanzi Childish Gambino, ndetse muri uwo mwaka yegukana igihembo cya MTV Video Music Award, bitangwa a televiziyo y’Abanyamerika yitwa MTV.
