Mu minsi iri imbere, zimwe muri station za Lisansi zigiye gusenywa ku mpamvu y’uko hari izubatse ahantu hatujuje ibisabwa, ndetse mu minsi mike hazasohorwa amabwiriza mashya agenga imyubakire yaho mu rwego rwo guca akajagari kari muri iri shoramari.
Uyu munsi kubaka station ni imwe mw’ishoramari rifite agatubutse aho usanga uwayubatse iyo ayikodesheje n’ikigo runaka ahabwa agera ku 10$ ku kwezi, cyangwa se ufite ikibanza ishobora kubakwamo agasaba ibyangombwa byo kuyihashyira, ubundi agakorana na sosiyeti zikora ibikomoka kuri Peteroli zikaba zamugurura.
Kubera impamvu y’uko uyu mushinga urimo agafaranga gatubutse, usanga ababijyamo mu buryo budafututse nabo biyongera umunsi ku wundi.
Hashize iminsi inzego zishinzwe uru rwego ziri mu bugenzuzi, zireba ko iziri mu gihugu zubatse mu buryo bujyanye n’igihe mu rwego rwo kugirango iyubakwa ryazo rijye rica mu mucyo.
Muri ubu bugenzuzi bwakozwe mu mujyi wa Kigali bwerekana ko hazasenywa station za Lisansi 19, kw’ikubitiro hakazasenywa icyenda zamaze guhabwa itariki ntarenywa yo kuba zasenywe na banyirazo mu minsi 60 uhereye tariki ya 4 Nzeri 2024.
Izi zigiye gusenywa ni station ziri mu bice byo mu bishanga biherereye mu mujyi wa Kigali. Byumwihariko kuko ibi bishanga bigiye gutunganywa ku nkunga ya Banki y’Isi isaga miliyoni 80$.
Ibi bishanga bitanu birimo icya Gikondo, icya Rwampara, icya Rugenge-Rwintare, icya Kibumba n’Igishanga cya Nyabugogo, aho buri gishanga kizatunganywa mu buryo bwacyo, bimeze nkuko icya Nyandungu kimeze.
Izi station zizasenywa harimo eshatu za Engen imwe iri kuri Poids Lourd n’izindi ebyiri ziri ku Giticyinyoni; harimo ebyiri za SP zirimo imwe iri Rwandex n’indi iri mu Rugunga.
Harimo kandi imwe ya Rubis iri ku Giticyinyoni, iyitwa Maxi iri ahazwi nka Poids Lourd ahahoze Car Wash, Lake Petroleum iri ku muhanda ugana i Rusororo n’iyahoze yitwa Hashi iri ku Kinamba ugana ku Gisozi.
