U Rwanda rwahawe kwakira amarushanwa mpuzamahanga ya Tennis, ATP Challenger 75 na ATP Challenger 100, ahuza abakinnyi babigize umwuga bari mu myanya myiza ku Isi mu mukino wa Tennis.
Umuyobozi w’Ishyirahamwe rya Tennis mu Rwanda, Karenzi Théoneste, ni we wemeje aya makuru, ashimangira ko ATP Challenger 75 na ATP Challenger 100, zizabera mu Rwanda muri uyu mwaka.
Biteganyijwe ko aya marushanwa abiri azakinwa mu gihe cy’ibyumweru bibiri kuva ku wa 24 Gashyantare kugeza ku wa 9 Werurwe 2025. Azajya abera ku bibuga bya Kicukiro Ecology Tennis Club.
ATP Challenger 75 na ATP Challenger 100 bizaba bifite agaciro kabarirwa mu bihumbi $175, asaga miliyoni 240 Frw.
ATP Challenger 75 izakinwa ku wa 24 Gashyantare, isozwe ku wa 1 Werurwe 2025, izatangwamo ibihembo bya $75,000, asaga miliyoni 100 Frw.
Iri rushanwa rizakurikirwa na ATP Challenger 100, izakinwa ku wa 2-9 Werurwe 2025, aho izaba ifite ibihembo bya $100,000, agera kuri miliyoni 140 Frw.
Aya marushanwa azitabirwa n’abakinnyi ba Tennis baturutse mu bice bitandukanye ku Isi, bahatanira gushaka amanota yo kugera mu bakinnyi 100 ba mbere no gukina amarushanwa ya ATP Tour na ‘Grand Slam’.
U Rwanda rukomeje kugirirwa icyizere cyo kwakira amarushanwa mpuzamahanga arimo ATP nyuma y’uko rubaye igihugu cya kabiri cyo Munsi y’Ubutayu bwa Sahara cyakiriye irushanwa rya “ATP Challenger 50 Tour”, inyuma ya Afurika y’Epfo.
Iri rushanwa ryitabiriwe n’abakinnyi basaga 60 babigize umwuga, bari mu myanya yo kuva ku 150 gusubiza hejuru ryakinwe hagati ya Gashyantare na Werurwe 2024.
