Umunya Esipanye Martí Soriano Pau ukinira ikipe ya Never Say Never (NSN) Development Team ni we wegukanye agace ka kabiri ka Tour du Rwanda 2026, kakinwe ku ntera y’ibilometero 134,6 kuva mu Mujyi wa Nyamata mu Karere ka Bugesera, kugera mu Karere ka Huye.
Aka gace kakinwe kuri uyu wa mbere tariki ya 23 Gashyantare 2026, kasojwe ikipe ya NSN yo mu Busuwisi ikinamo uwegukanye agace ka mbere ari yo yongeye kubonekamo uwegukana agace ka kabiri ikomeza kuyobora isiganwa.
Uyu musore w’imyaka 21 ukinnye bwa mbereisiganwa rya Tour du Rwanda, yakoresheje amasaha atatu, iminota icumi n’amasegonda icyenda (3h10’09’).
Soriano Pau yabaye umunya Esipanye wa 4 wegukanye agace ka Tour du Rwanda kuko byaherukaga gukorwa na Rodriguez Christian wegukanye agace ka 8 mu 2021.
Umunyarwanda wasoreje hafi ni Nsngiyuma Shemu ukinira Team Rwanda, wasoreje ku mwanya wa 20 asigwa n’uwa mbere ho 1’39’’.
Uko agace ka kabiri ka Tour du Rwanda kagenze
Agace ka kabiri k’isiganwa ku magare rya Tour du Rwanda katangiriye mu Mujyi wa Nyamata ku isaha ya saa sita z’amanywa. Abakinnyi babanje kugenda ikilometero kimwe mbere y’uko batangira kubarirwa ibihe.
Umujyi wa Nyamata winjiye mu mateka yo gutangiriramo agace ka Tour du Rwanda bwa mbere kuva iri rushanwa rishyizwe ku rwego rwa 2,1 mu 2019.Ubwo Tour du Rwanda iheruka guhagurukira mu Bugesera hari mu 2017.
Mu bakinnyi 84 batangiye Tour du Rwanda 2026, batandatu bavuyemo nyuma y’Agace ka Mbere ka Rukomo-Rwamagana. Aba barimo Ilboudo Soumaila ukinira African Mixed Team, wasoje nyuma y’ibihe byagenwe.
Abakinnyi bane bavuye mu isiganwa mbere y’uko risozwa barimo De Mei Andrea [May Stars], Togola Moussa [African Mixed Team], Yilmaz Yunus Emre [Istanbul Team] na Belachew Mekonnen Addisu [Ikipe y’Igihugu ya Ethiopia].
Ni mu gihe Umunya-Eritrea Teweldbrhan Dawit ukinira May Stars we, yirukanwe mu irushanwa nyuma yo gufata ku modoka y’ikipe ye. Uyu n’umutoza we Aklilu Haile Zeweldi bakuwe burundu mu irushanwa, banacibwa amande ya 200 CHF, akabakaba ibihumbi 370 Frw.
Umunya-Israel Einhorn Itamar ukinira NSN Development Team ni we wahagurutse mu Karere ka Bugesera yambaye umwambaro w’umuhondo, uhabwa uyoboye abandi muri Tour du Rwanda.
Mu batangiye neza harimo abanyarwanda
Aka gace ka Kabiri ka Tour du Rwanda ka Nyamata-Huye kagitangira, abakinnyi batanu barimo Umudage Heidemann Miguel ukinira Rembe Rad-Net, Nkundabera Eric (Team Rwanda), Uwiduhaye Mike (Benediction Banafrica Team) ndetse na Martins Lemes Bruno na Sousa Silva Gabriel bakinira Localiza Meoo / Swift Pro Cycling bahise bacomoka abandi.
Nyuma y’umwanya muto, Heidemann Miguel ukinira Rembe Rad-Net], Erasmus Alexander ukinira Tshenolo Pro Cycling Team ndetse na Martins Lemes Bruno wa Localiza bahise bayobora kuva i Bugesera kugera i Huye mu birometero hafi 10 bya nyuma bakiri imbere.
Amanota ya Sprint ya mbere yatangiwe ku Ruhuha mu Bugesera ni bo bayegukanye. Nyuma yo kwegukana aya manota, Heidemann yabonye amasegonda atatu binyuze mu cyitwa ‘bonifications’ yashyizweho mu buryo bwo gutera abakinnyi imbaraga ahatambika.
Erasmus yegukanye amasegonda abiri mu gihe Martins yahawe rimwe. Aya masegonda abarwa nyuma agace kari gukinwa karangiye, agakurwa ku bihe bakoresheje, byongerera abayegukanye kwitwara neza.
Mu birometero 10 bya nyuma habaye uguhangana cyane kuko igikundi cyaburaga amasegonda make ngo gishyikire abasore batatu b’imbere. Cyaje kubashyikira ndetse batangira guhangana bashaka utsinda.
Ihangana ryari cyane ku basore ba NSN yari ifite umwambaro w’umuhondo,ndetse n’abanya Eritrea. Byaje kurangira Martí Soriano Pau abatsinze yegukagana agace ka kabiri ka Tour du Rwanda ku nshuro ye ya mbere.
